मुख्यमंत्री सावंतांनंतर विश्‍वजीत राणे 'अ‍ॅक्शन मोड'मध्ये

पणजी: मुख्यमंत्री प्रमोद सावंत यांनी बुधवारी निकृष्ट रस्त्यांना जबाबदार असलेल्यांवर थेट कारवाई करीत आपण ‘अ‍ॅक्शन मोड’वर आल्याचे संकेत दिले. त्यानंतर पंचायत मंत्री माविन गुदिन्हो यांनी घरांना क्रमांक देण्यासाठी पंच आणि पंचायत सचिवांना पैसे देऊ नका आणि कुणी मागितल्यास थेट माझ्याकडे तक्रार करा, असे सूचित केले होते. आता नगरनियोजन मंत्री विश्‍वजीत राणे हेही आक्रमक झाले असून त्यांनी भ्रष्टाचारमुक्तीची घोषणा केली. (CM Pramod Sawant and Vishwajit Rane in action mode)

आपल्या खात्यांमध्ये सरकारी कामांसाठी कोणी पैसे मागत असेल तर त्याची थेट तक्रार आपल्याकडे करा, आपण त्यावर कारवाई करू, असे सांगत अशा तक्रारी नोंदवण्यासाठी नवी हेल्पलाईन आणि ईमेल जाहीर करणार असल्याची घोषणा केली.

दक्षिण गोव्यासाठी नवे वैद्यकीय महाविद्यालय
गोव्यात (Goa) सध्या केवळ उत्तर गोव्यात (North Goa) एकमेव सरकारी वैद्यकीय महाविद्यालय आहे. त्यामुळे त्यावर बराच ताण येतो. दक्षिण गोव्यासाठी खासगी किंवा सरकारी वैद्यकीय महाविद्यालय सुरू करण्यासाठी आरोग्य खात्याचा प्रयत्न असून यासाठी तज्ज्ञ समिती नेमून लवकरच नीती आयोगाची भेट घेणार असल्याची माहिती राणे यांनी दिली. आरोग्य खात्यातील सुधारणांसाठी शंभर नव्या वैद्यकीय अधिकाऱ्यांची नेमणूक करण्यात येणार असल्याचे राणे यांंनी स्पष्ट केले.

पारदर्शक कारभार
सावंत मंत्रिमंडळात विश्‍वजीत राणे (Vishwajit Rane) यांच्याकडे आरोग्य, नगरनियोजन, नगरविकास, महिला आणि बाल कल्याण, वन या महत्त्वाच्या खात्यांची जबाबदारी देत त्यांना क्रमांक दोनवरील पद दिले. मुख्यमंत्र्यांनंतर आता मंत्री राणे यांनी आक्रमक पवित्रा घेत आपल्या खात्यांमध्ये मोठ्या बदलांचे संकेत दिले आहेत. हे करताना स्वच्छ आणि भ्रष्टाचारमुक्त प्रशासन करण्यावर भर दिला आहे. त्यांनी भ्रष्टाचार मुक्तीसाठी नवी हेल्पलाईन आणि इमेल जाहीर करणार असल्याचे सांगितले. कोणीही सामान्य व्यक्ती या इमेलवर तक्रार नोंदवू शकेल.