Ayushman Bhava: नागरिकांनी आरोग्याबाबत जागरूक असावे!

Ayushman Bhava: अनेक आजाराची प्राथमिक लक्षणे बऱ्याच वेळा चट्कन लक्षात येत नाहीत. सुशिक्षित लोकही आरोग्यासंदर्भात जागरूक नसतात. अशा वेळी ल़ोकप्रतिनिधींनी विविध स्तरांवर अशा आरोग्य मेळाव्यांचे आयोजन करणे अपेक्षित आहे, असे प्रतिपादन सभापती रमेश तवडकर यांनी केले.

केंद्र सरकारच्या ‘आयुष्यमान भव’ या योजनेअंतर्गत चावडी-काणकोण येथील सामुदायिक इस्पितळात आरोग्य मेळावा आयोजित केला होता. यावेळी व्यासपीठावर तवडकर यांच्यासह नगराध्यक्ष रमाकांत नाईक गावकर, सीडीपीओ आशंका गावकर, आरोग्य अधिकारी डॉ. जुझे तावारिस आदी उपस्थित होते.

डॉ. जुझे तावारिस यांनी प्रमुख पाहुणे व उपस्थितांचे स्वागत केले. सर्व उपकेंद्रांत हा कार्यक्रम २ ऑक्टोबरपर्यंत चालणार असल्याचे आशंका गावकर यांनी सांगितले.

नगराध्यक्ष गावकर म्हणाले की, या योजनेअंतर्गत विविध प्रकारच्या चाचण्या करण्यात येत असून याचा लाभ करून घेणे गरजेचे आहे. त्याकरता लोक जागृती झाली पाहिजे. या योजनेअंतर्गत इस्पितळातच वेगवेगळ्या गरजेच्या वस्तूंची दालने खुली केली होती. सूत्रसंचालन डॉ. दिवाकर वेळीप, तर डॉ. नीलिमा देसाई यांनी आभार मानले.