Water Bill Hike : सरकारने पाणी दरवाढ मागे घ्यावी; ख्रिस्तोफर फोन्सेका आक्रमक

Water Bill Hike : सरकारने पाणी दरात जी पाच टक्क्यांची वाढ घोषित केली आहे, ती त्वरित मागे घ्यावी, अशी मागणी भारतीय कम्युनिस्ट पक्षाच्या वतीने ख्रिस्तोफर फोन्सेका यांनी पत्रकार परिषदेत केली. यावेळी ॲड. सुहास नाईक, ॲड. राजू मंगेशकर व इतर पदाधिकारी उपस्थित होते.

निवडणुकीपूर्वी भाजपने 16 हजार लिटर पाणी मोफत देण्याची घोषणा केली होती. ती फक्त वल्गना असून त्याला जनता बळी पडली. 6 महिन्यांच्या आत भाजप वचन विसरले आणि पाणी दरवाढ केली. न फुटण्याची शपथ धुळीस मिळवून कॉंग्रेसचे आमदार भाजपमध्ये गेले. त्यामुळे राजकारण म्हणजे लोकांना आता विनोदच वाटू लागला आहे, असे फोन्सेका म्हणाले. गोव्याच्या डोईवरचे कर्ज 23 हजार कोटींवर पोहचले आहे. सरकारची करवाढ चालूच आहे. गॅस सिलिंडर, पेट्रोल, डिझेल दरवाढ होतच आहे. हे कुठेतरी थांबले पाहिजे, असे ते म्हणाले.

सक्रियपणे निवडणूक लढवणार

मागची निवडणूक पक्षाने लढवली नाही. यापुढे पक्ष सक्रियपणे राजकारणात उतरणार असल्याची घोषणा फोन्सेका यांनी केली. कामगार चळवळ, पर्यावरण विषयांत या पक्षाने भरपूर काम केले आहे. देशाचे भविष्य बदलण्याची ताकद कामगारांमध्ये आहे. मुख्यमंत्र्यांनी अंबाला येथे गोवा मुक्ती संग्रामातील दिवंगतांच्या पत्नींना धनादेश दिला, ही चांगली गोष्ट आहे. पण त्यांनी गोव्यातील स्वातंत्र्यसैनिकांच्या पत्नींना वंचित ठेवू नये, अशी मागणी केली.