गोवेकरांना वेध लागले नाताळ आणि नववर्षाचे..!

गोवा वेल्हा (Christmas Festival) : डिसेंबर महिना उजाडला आणि लोकांना नाताळ व नववर्ष 2022 चे वेध लागायला सुरवात झाली. तिसवाडी, बार्देश, सासष्‍टी, मुरगाव, काणकोण तालुका त्‍याला अपवाद नाही. ठिकठिकाणी या उत्सवाची लगबग दिसून येत आहे. यंदा हे दोन्ही उत्सव (Festival ) उत्साहात साजरे होतील, अशी माहिती सूत्रांनी दिली.

संपूर्ण गोवाभर नववर्ष व नाताळ (Christmas) उत्सव मोठ्या उत्‍साहात साजरा केला जातो. 25 डिसेंबर रोजी प्रभू येशू ख्रिस्तांचा जन्मदिवस. त्‍यानिमित्त आठवडाभर त्यांच्या जन्माचे स्वागत व नाताळचे कार्यक्रम आखण्यात लोक गुंतले आहे. गावातली लहान-मोठी गिरिजाघरे तसेच ख्रिस्ती बांधवांच्या घराघरांत हा उत्सव साजरा करतात. स्थानिक धर्मगुरुंच्‍या मार्गदर्शनाखाली नाताळ उत्सवाची कामे सुरू झाली आहेत. यामध्‍ये रंगरंगोटी, सजावट, प्रभू येशू ख्रिस्ताच्या जन्मावर आधारीत आकर्षक गोठे, नक्षत्रे आकार घेत आहेत. चर्चमध्येही उत्‍सवाचे नियोजन करण्‍यासंदर्भात कामे सुरू आहेत.