प्रकल्पांविरोधात वज्रमूठ! नैसर्गिक जलस्रोत, शेतीसाठी चिंबलवासीय एकवटले; युनिटी मॉल, प्रशासकीय स्तंभास विरोध

पणजी: चिंबल पठारावरील ‘तोयार’ तलावाजवळ कोणत्‍याही परिस्‍थितीत ‘युनिटी मॉल’ होऊ देणार नाही. त्याविरोधात आम्ही शांततेने विरोध करत आहोत, प्रसंगी न्यायालयीन लढा देण्‍याची आमची तयारी आहे, असा इशारा चिंबलवासीयांनी दिला. कदंब पठारावरील नियोजित प्रशासकीय स्तंभ इमारतीलाही यावेळी कडाडून विरोध दर्शविण्‍यात आला.

या दोन्‍ही प्रकल्‍पांविरोधात चिंबल ग्रामस्‍थांसह राजकीय नेते आणि सामाजिक कार्यकर्तेही कदंब पठारावर एकवटले. या सभेला ‘आरजी’चे आमदार वीरेश बोरकर, ‘आप’चे प्रदेशाध्यक्ष ॲड. अमित पालेकर, जैवविविधा समितीचे अध्यक्ष गोविंद शिरोडकर, प्रतिमा कुतिन्हो, अजय खोलकर व अनेक मान्यवर उपस्थित होते. तत्पूर्वी, गाकुवेध फेडरेशन आणि चिंबल कला-सांस्कृतिक मंचातर्फे गावातून पठारापर्यंत मोर्चा काढण्‍यात आला.

प्रशासन स्तंभाच्‍या उभारणीत अडथळा

विधानसभेच्या पावसाळी अधिवेशनात चिंबलच्या हद्दीतील कदंब पठारावर प्रशासन स्तंभ उभारणार असल्याचे सरकारने जाहीर केले आहे. आता स्थानिक ग्रामस्थांनी आयटीच्या जागेवरील या प्रकल्पालाही विरोध दर्शविला आहे. त्यामुळे प्रशासन स्तंभाच्या उभारणीपूर्वीच त्याला अडथळा निर्माण झाला आहे.

आम्‍हाला हे दोन्‍ही प्रकल्‍प नकोच आहेत. कारण त्‍यामुळे तलावासह समाजजीवनावर विपरित परिणाम होणार आहे. या तलावाच्या पाण्यावर आदिवासी समाज भाजीपाला पिकवतो. मॉल आणून येथील नैसर्गिक जलस्रोत संपविण्याचा सरकारचा डाव आहे. - ॲड. अमित पालेकर, प्रदेशाध्यक्ष (आप)

राज्‍यात मोठ-मोठे प्रकल्प आणून गोवा संपविला जात आहे. त्याविरोधात आवाज उठवणाऱ्या सामाजिक कार्यकर्त्यांना मारहाण केली जाते. भीतीमुळे मलाही या आंदोलनाला न जाण्‍याचे घरातून बजावण्‍यात आले होते, पण मी सहभागी झालेच. कारण येथील लोकांचा प्रश्‍‍न महत्त्वाचा आहे. येथील जैवविविधता टिकली पाहिजे. - प्रतिमा कुतिन्हो, सामाजिक कार्यकर्त्या