CM Pramod Sawant: गोमंतकीय वारकऱ्यांसाठी खूशखबर! सावंत सरकार पंढरपुरात बांधणार भक्तनिवास

पंढरपूर येथील विठ्ठल रुक्मिणीच्या दर्शनासाठी गोवा राज्यातून लाखो भाविक दरवर्षी आषाढी कार्तिकीच्या निमित्ताने येतात. येथे येणाऱ्या गोव्यातील भाविकांसाठी आता गोवा सरकार भक्तनिवास बांधणार आहे.

यासाठी सोलापूर जिल्हा प्रशासनाने जागा उपलब्ध करुन द्यावी, अशी मागणी खुद्द गोव्याचे मुख्यमंत्री डॉ. प्रमोद सावंत यांनी केली आहे. जागा उपलब्ध झाल्यानंतर गोवा सरकार त्या ठिकाणी सर्व सोयी सुविधांनी युक्त असे भक्तनिवास बांधेल.

दरम्यान, या संदर्भात जिल्हा प्रशासनाशी पत्रव्यवहार केला जाईल, अशी माहितीही मुख्यमंत्री सावंत यांनी आज दिली.

गुरुपौर्णिमेच्या निमित्ताने मुख्यमंत्री आज विठ्ठल रुक्मिणीच्या दर्शनासाठी पंढरपुरात आले होते. यावेळी त्यांनी पत्रकारांशी बोलताना राज्यातील सर्व सामान्य लोकांना सुख शांती समृद्धी मिळू दे असे आपण विठुरायाला साकडे घातल्याचे सांगितले.