Chicken Garbage : चिकनचा कचरा तीन दिवस पडून ; विक्रेत्यांची मुख्याधिकाऱ्यांकडे धाव

Chicken Garbage : मडगाव, एसजीपीडीएच्या चिकन मार्केटमधील राहिलेले मांस आणि इतर कचरा मागील तीन दिवस उचलण्यात आलेला नाही.

यामुळे संतप्त विक्रेत्यांनी मडगाव पालिकेत धाव घेऊन गोवा घनकचरा व्यवस्थापन महामंडळाने नेमणूक केलेल्या कंत्राटदाराकडून तो कचरा उचलण्यात यावा, अशी मागणी मडगाव पालिका मुख्याधिकाऱ्यांकडे केली. मुख्याधिकाऱ्यांनी तत्काळ कचरा उचल करण्याचे निर्देश देण्यात येतील, असे सांगत त्यांना आश्वस्त केले.

एसजीपीडीएच्या मार्केटमधील चिकन शॉपमधील मांसाचा कचरा हा मागील तीन दिवस उचलण्यात आलेला नाही.

यामुळे चिकन मार्केट परिसरात दुर्गंधी पसरत चालली आहे. मार्केटमध्ये येणाऱ्या ग्राहकांकडूनही विक्रेत्यांना विचारणा होत असून दुकानातील कामगारही दुर्गंधीमुळे कचरा उचल झाल्याशिवाय कामावर येण्यास मनाई करत आहेत, अशा तक्रारी मार्केटमधील विक्रेत्यांनी केल्या.

‍चिकन मार्केटमधील विक्रेत्यांनी मडगाव पालिका मुख्याधिकारी गौरीश शंखवाळकर यांची भेट घेत समस्या मांडल्या. एसजीपीडीएकडील कचरा उचल याआधी होत होती. मात्र, मागील तीन दिवसांपासून चिकन कचरा उचलण्यात आलेला नाही.

याआधीचा कंत्राटदार व आता नेमण्यात आलेल्या कंत्राटदारामधील भांडणामध्ये सध्या कचरा उचल तशीच राहिली आहे. विक्रेत्यांसह मार्केटमधील ग्राहकांना याचा त्यास होत आहे.

एजन्सींमध्ये विसंवादाचा फटका

१) पालिका मुख्याधिकारी गौरीश शंखवाळकर यांनी दिलेल्या माहितीनुसार, गोवा घनकचरा व्यवस्थापन महामंडळाकडून चिकन मार्केटसह मडगाव पालिका व वास्को पालिका क्षेत्रातील चिकनचा कचरा उचल करण्यासाठी एजन्सी नेमण्यात आलेली आहे. त्यामुळे एजन्सीच थेट जागेवरून कचरा उचल करते.

२) याआधीच्या एजन्सीचे काम बंद करत नवीन एजन्सीला काम दिलेले आहे. या एजन्सींमध्ये विसंवाद झाल्याने कचरा त्याचठिकाणी राहिलेला असू शकतो. तत्काळ त्यासंदर्भात निर्देश देत कचरा उचल करण्यास सांगितले जाईल, असे आश्वासन चिकन विक्रेत्यांना दिले आहे.