म्हापशात ‘स्वराज्य गोमंतक’ तर्फे ‘छत्रपती शिवाजी महाराजांची जयंती यात्रा’

म्हापसा: ‘स्वराज्य गोमंतक’तर्फे शिवजयंती निमित्त म्हापसा शहरात ‘जय भवानी, जय शिवाजी’च्या जयघोषात भव्य मिरवणूक काढण्यात आली. ‘शिवजयंती यात्रा’ म्हणून परिचित असलेल्या या वार्षिक मिरवणुकीत ढोल पथके, अश्वदल, मर्दानी खेळ यांचा समावेश होता. टॅक्सीस्थानकावर मिरवणुकीचा समारोप करून रात्री उशिरा त्या ठिकाणी व्यासपीठीय कार्यक्रम झाला.

बोडगेश्वर मंदिराच्या प्रांगणात नगराध्यक्ष शुभांगी वायंगणकर यांच्या हस्ते ध्वजारोहण करून मिरवणुकीचा प्रारंभ झाला. संस्थेचे अध्यक्ष प्रशांत वाळके, उदय मुंज, जयेश थळी व इतर कार्यकर्ते या वेळी उपस्थित होते. मिरवणुकीतील सादरीकरणाचे तीन प्रमुख कार्यक्रम बोडगेश्वर मंदिराचे प्रांगण, हुतात्मा चौक व टॅक्सीस्थानक अशा तीन ठिकाणी झाले.