‘कोरे’च्या माजी अध्यक्षांसह सहा जणांवर आरोपपत्र

मडगाव: जमीन खरेदीप्रकरणी 6.5 कोटींचा घोटाळा केल्याप्रकरणी कोकण रेल्वे महामंडळाचे निवृत्त अध्यक्ष भानू तायल यांच्यासह सहा जणांवर सीबीआयने मडगाव न्यायालयात आरोपपत्र दाखल केले असून हे प्रकरण आता 5 मे रोजी सुनावणीस येणार आहे.

कोकण रेल्वेचे जनसंपर्क अधिकारी बबन घाटगे, निवृत्त सरव्यवस्थापक उदय प्रकाश दास, मुख्य व्यवस्थापक नंदू तेलंग, अमरनाथ गुप्ता आणि सुधीर फडके हे या प्रकरणातील इतर संशयित असून त्यांच्याविरोधात भा. दं. संहितेच्या 409, 420 आणि 120 ब तर भ्रष्टाचार प्रतिबंध कायद्याच्या 13 (2) कलमाखाली गुन्हा नोंद केला आहे.

सीबीआयच्या आरोपपत्रानुसार 2010 साली कोकण रेल्वे कर्मचाऱ्यांसाठी कमी दरात घरे बांधून देण्याच्या योजनेखाली दवर्ली येथे 7700 रुपये प्रतिचौरस मीटर या दराने 11 हजार चौ.मी. जागा खरेदी केली होती.