IMD Goa: गोव्यात आज पावसाची शक्यता; वेधशाळेचा अंदाज

IMD Goa: मार्च महिन्यातील गोव्याचे तापमान नवनवे विक्रम नोंदवत असताना आता आगामी काही दिवस मात्र गोव्यात पावसाचा शिडकावा होणार आहे. गोव्यात आज, बुधवारी (ता. 15) पावसाचा अंदाज गोवा वेधशाळेने वर्तवला आहे.

तसेच आगामी काही दिवसही पावसाचा अंदाज वर्तविण्यात आला आहे. 15 ते 19 मार्च या काळात पाऊस पडेल, असा अंदाज आहे.

आगामी काही दिवस पाऊस होणार असल्याचा अंदाज गोवा वेधशाळेने वर्तविला आहे. काही भागात तुरळक सरी तर काही ठिकाणी गडगडाटी पाऊस होईल, असे हवामान खात्याने म्हटले आहे. यामुळे कडक उन्हामुळे त्रासलेल्या नागरिकांना दिलासा मिळू शकतो.

गोव्यात वातावरणीय आर्द्रतेचे प्रमाण वाढले आहे. तसेच, कोकण कर्नाटक भागात कमी दाबाचा पट्टा तयार होण्याची शक्यता असल्याने आगामी दिवसात राज्यात पावसाची शक्यता आहे. या काळात राज्यातील कमाल तापमानात 2 ते 3 अंशाने घट होण्याची शक्यता आहे.

दरम्यान, गोव्यात रविवारी काणकोण येथे सर्वाधिक 39.7 अंश सेल्सिअस कमाल तापमानाची नोंद झाली आहे.