आता अटल सेतूवर तपासला जाणार वाहनांचा वेग; 'सीसीटीव्ही' कार्यरत

पणजी : झुआरी पुलावर बुधवारी मध्यरात्री झालेल्या भीषण अपघातामुळे संपूर्ण राज्यभर हळहळ व्यक्त होत आहे. तब्बल 12 तासांच्या अथक प्रयत्नांनंतर गाडी आणि मृतदेह बाहेर काढण्यात आले. यानंतर अनेकांनी सरकारप्रती आपली नाराजी व्यक्त केली. रस्त्यांच्या खराब स्थितीमुळे हा अपघात झाला असल्याचे बोलले जात आहे.

(CCTV Cameras on Atal Setu)

वाहनचालक अतिवेगाने वाहन चालवतात आणि त्यामुळे आपघातांना आमंत्रण मिळते. त्यामुळे आता सरकारने ठोस पावले उचलत कायद्यात बदल करण्याचा निर्णय घेतला आहे.

यानंतर आता अटल सेतूवर वेग नियंत्रणासाठी सीसीटीव्ही कॅमेरा बसवण्यात आला आहे. इथून पुढे पुलावरून येणाऱ्या जाणाऱ्या वाहनांचा वेग सीसीटीव्ही कॅमेऱ्यात टिपला जाणार आहे. अतिवेगात वाहन चालवणाऱ्यांना यामुळे चांगलीच चपराक बसणार आहे.

दरम्यान, 'गोव्यात आतापर्यंत रात्रीच्यावेळी झालेले 90 ते 95 टक्के अपघात हे 'ड्रंक अँड ड्राईव्ह'मुळे झाले आहेत. दारू पिऊन वाहन चालवणे पूर्णपणे बंद झाले पाहिजे.

खरतर मद्य पिऊन वाहन चालवणाऱ्यांना फक्त दंड घेऊन सोडण्यात येते. पण यात बदल झाला पाहिजे. यावर निर्बंध घालण्यासाठी कायद्यात बदल करण्याचीही सरकारची तयारी आहे, असे मत मुख्यमंत्री प्रमोद सावंत यांनी व्यक्त केले आहे.