सूर्यास्‍ताला सुरू झालेली पार्टी सूर्योदयाला संपली!

मोरजी: मोरजी किनारी (Morjim Beach) मोठ्या संख्येने देशी पर्यटक (Tourist) येऊ लागले असून, शनिवार आणि रविवार या सुट्टीच्‍या दिवशी तर प्रचंड गर्दी झाली होती. त्यांचे मनोरंजन करण्यासाठी शनिवारी सूर्यास्तवेळी सुरू झालेली पार्टी (Night Party) दुसऱ्या दिवशी सूर्योदयापर्यंत सुरू होती.

या संगीत रजनीतून कोरोना महामारीचे जोरदार स्वागत रिसॉर्टमालक आणि क्लबने केले आहे. शेकडो पर्यटक गर्दी करून नाचत असल्याचा व्‍हिडिओ सोशल मीडियावर व्‍हायरल झाला आहे. विशेष म्‍हणजे कोणीच मास्क घातले नव्हते. सरकारने अजून पार्ट्यांसाठी परवनगी दिलेली नाही.

कॅसिनो, बोट क्रुझ, समुद्रकिनारी तुफान गर्दी

पर्यटनासाठी कोरोनाचे निर्बंध कमी केल्यानंतर गोव्यात पर्यटकांची गर्दी वाढली आहे. गेल्या दोन दिवसांत मोठ्या प्रमाणात पर्यटक गोव्यात आले असून किनारे, कॅसिनो, बोट क्रुझ आणि पर्यटनस्थळांवर मोठी गर्दी झाली आहे. रविवारी तर अनेकांना पणजी शहरात बुकिंगसाठी हॉटेल शोधावे लागत होते. सध्या गोव्यात येणारे पर्यटक हे देशी पर्यटक आहेत. विदेशी पर्यटक गोव्यात यायला हवेत यासाठी व्हिसा खुला करण्याची मागणी ‘ट्रॅव्हल अँड टुरिझम असोसिएश’ने केली आहे.  उत्तर गोव्यातील कळंगुट, बागा, अंजुणा तर दक्षिण गोव्यातील कोलवा, बाणावली किनाऱ्यांवर पर्यटकांची गर्दी वाढत आहे. पणजीजवळच्या मिरामार, दोनापावल येथे पर्यटक पर्यटनाचा आनंद घेत आहेत.