Carambolim Lake: पाणथळ अधिसूचित होऊनही करमळी तळे अद्याप वन खात्याकडेच! शेतकऱ्यांच्या समस्या कायम

तिसवाडी: करमळी येथील तळे हे पाणथळ म्हणून अधिसूचित होऊनही त्याचा ताबा अद्याप वन खात्याकडेच आहे. अनेक वर्षांपूर्वी उच्च न्यायालयाकडून या तळ्याचा ताबा वन खात्याकडे दिला होता. या तळ्यासाठी व्यवस्थापन समिती गठित करण्यास पंचायतीकडून विलंब होत असल्याचे कारण सांगितले जात आहे.

सध्या पाणथळ म्हणून अधिसूचित केल्यानंतर पाणथळ प्राधिकरण आणि वन खात्यात समन्वयाने पुढील वाटचाल करत आहोत, अशी माहिती गोवा जैवविविधता मंडळाचे सदस्य सचिव प्रदीप सरमोकादम यांनी दै. ‘गोन्मतक’ला दिली. या तळ्यावरून सध्या गावात प्रचंड अस्वस्थता निर्माण झाली असून यावर तोडगा काढण्यासाठी पाणथळ प्राधिकरण आणि पंचायतीने समन्वयाने काम करण्याची मागणी शेतकरी आणि स्थानिकांनी केली आहे.

जलस्रोत खात्याकडून सौंदर्यीकरणाचे काम केले जाईल. यासंदर्भात प्राधिकरणाची मान्यता घेतली जाईल. आम्ही त्यांना काही सूचना केल्या आहेत, त्या अंतर्भूत केल्या जातील, असे सरमोकादम यांनी सांगितले.

हे तळे पाणथळ म्हणून अधिसूचित केल्यानंतर करमळी पंचायतीला तळे व्यवस्थापन समिती स्थापन करण्याची सूचना केली होती; परंतु पंचायतीकडून सहकार्य केले जात नाही. शेतकऱ्यांच्या काही समस्या असतील त्यांचे निवारण ही समिती गठित केल्यानंतर होईल. मात्र, आजपर्यंत ही समिती गठित केलेली नाही, असे सरमोकादम यांनी सांगितले.

या तळ्याच्या शेजारी शेती करणाऱ्या शेतकऱ्याचे सुमारे एक लाख रुपयांचे नुकसान झाल्याचे वृत्त दै. ‘गोन्मतक’मध्ये प्रसिद्ध झाले होते. यासंदर्भात सरमोकादम म्हणाले की, तळ्याशेजारी शेती करण्यास प्राधिकरणाकडून प्रोत्साहन दिले जात आहे. परंतु यासाठी तळे व्यवस्थापन समिती गठित करण्याची आवश्यकता आहे.

पूर्वी तळ्याचे पाणी सुकवून तेथे शेती केली जात होती. मात्र आता पाणी सुकवल्यास पक्षी येणार नाहीत, असा पक्षीप्रेमींचा दावा आहे. तसेच काही शेतकऱ्यांनी आपली जमीन विक्री करण्याची मागणी केली आहे. त्यामुळे पाणी सुकवून शेती करणे शक्य नाही.