Sangem: कार शिकतानाच झाड कोसळून महिला ठार

Sangem: ड्रायव्हिंग स्कूलच्या चालत्या गाडीवर गुलमोहराचे जीर्ण झाड उन्मळून पडल्याने वाहन चालवण्यास शिकणारी अनिता फर्नांडिस (वय ३९ वर्षे) ही बामणसाय-सांगे येथील महिला जागीच ठार झाली, तर प्रशिक्षक चालक नासिफ शेख याच्या हाताला गंभीर दुखापत झाली.

दुर्घटनेत गाडीचा चेंदामेंदा झाला. धोकादायक झाडे कापण्यास प्रशासनाला अपयश आल्याचा ठपका सांगेवासीयांनी ठेवला आहे. काल सकाळी साडेनऊ वाजता सांगे बस स्थानकावरून अनिता फर्नांडिस ही महिला बालाजी ड्रायव्हिंग स्कूलच्या प्रशिक्षक चालकासह कार चालविण्याचे प्रशिक्षण घेत होती.

पुढे अवघ्या पाच मिनिटांत सांगे पोलिस स्थानकाजवळ पोहोचताच रस्त्याच्या डाव्या बाजूला असलेले जीर्ण गुलमोहराचे झाड चालत्या कारवर पडले आणि अनिता जागीच चिरडली गेली.

प्रशिक्षक चालक नासिफ शेख यांचा हात मोडला. त्यांना जिल्हा हॉस्पिटलमध्ये उपचारासाठी पाठविले आहे. मृत अनिता यांचे पती परदेशी असल्यामुळे तिचा मृतदेह शवागारात ठेवण्यात आला आहे.

या दुर्घटनेमुळे सांगे-उगे हा मुख्य रस्ता दोन तास वाहतुकीसाठी ठप्प झाला. अखेर अग्निशमन दलाच्या जवानांनी जेसीबीच्या साहाय्याने झाड हटवून वाहतूक पूर्ववत सुरू केली. या घटनेचा पंचनामा पोलिस उपनिरीक्षक स्वदेश देसाई यांनी केला.

अनेकदा वन खाते धोकादायक झाडे कापण्यासाठी नागरिकांना परवानगी देत नाही, असा आरोप गुरुनाथ नाईक यांनी केला.वास्तविक अशी परवानगी मिळाल्यास अशा दुर्घटना टाळता येणे शक्य आहे.

अनिता फर्नांडिस या महिलेचा मृत्यू सांगे मतदारसंघातील रस्त्यांलगतच्या धोकादायक झाडांकडे दुर्लक्ष झाल्याने झाला, असे नगरसेवक मेशू डिकॉस्ता यांनी म्हटले आहे. डिकॉस्ता यांनी संपूर्ण सांगे मतदारसंघाच्या मुख्य रस्त्याच्या बाजूला असलेली धोकादायक झाडे वन खात्याने कापून टाकण्याची मागणी केली आहे.

भविष्यात अशा दुर्घटना टाळण्यासाठी झाडांकडे दुर्लक्ष करू नये,असे सांगून दुर्लक्षामुळे आज निरपराध महिलेचा बळी गेल्याचे म्हटले आहे.