Bicholim News : भारताला जागतिक ताकद बनविण्यासाठी क्षमतावान व राष्ट्र समर्पित नेत्यांची गरज : प्रा.वल्लभ केळकर

Bicholim : क्षमतावान व राष्ट्र समर्पित नेत्यांची आमच्या देशाला गरज असून त्यांच्या जोरावरच आपला देश एक जागतिक ताकद म्हणून नावारूपास येईल, असे प्रतिपादन प्रा. वल्लभ केळकर यांनी मुळगाव येथील ज्ञानप्रकाश उच्च माध्यमिक विद्यालयाच्या विद्यार्थी मंडळ पदग्रहण सोहळ्यात प्रमुख वक्ते या नात्याने बोलताना केले.

विद्यार्थी जीवनात नेतृत्व केलेल्या अनेक तरुणांनी राष्ट्रीय विषयात महत्त्वाची भूमिका बजावली आहे. आज आपल्या समाजात अनेक दिखाऊ नेते पाहायला मिळतात. जे राष्ट्र हितापेक्षा स्वहिताला जास्त महत्त्व देतात. शपथ घेतलेल्या तरुणांनी अशा नेत्यांचा आदर्श न घेता राष्ट्र आणि समाजाला वाहून घेतलेल्या लोकांचा आदर्श घ्यावा.

नेते हे फक्त राजकारणातच नसतात तर सामाजिक जीवनात सुद्धा हजारो लोक लोकांचे नेतृत्व करतात. विवेकानंद, जेआरडी टाटा, एमएस विश्वेश्वरय्या, नारायण मूर्ती या सारख्या दिग्गजांनी आपल्या प्रामाणिक आणि राष्ट्र समर्पित जीवनाने आदर्श निर्माण केले, असे प्रा. केळकर पुढे बोलताना म्हणाले.

युवक विधायक मार्गावर असतील, तर राष्ट्राचा उत्कर्ष नक्कीच होतो. त्यामुळे सत्ता ही मिळालेली संधी समजून युवकांनी काम केल्यास त्याची कधीच झिंग चढणार नाही आणि त्याचा नक्कीच विधायक उपयोग होईल. असेही प्रा. केळकर म्हणाले.

व्यासपीठावर संस्थेच्या अध्यक्ष प्रिया राऊत, विद्यालयाचे प्राचार्य लक्ष्मीकांत परब, विद्यार्थी मंडळाचे प्रभारी प्रा. शिवानंद हिरोजी आणि सहप्रभारी प्रा. दयांनंद कुंभार आदी मान्यवर उपस्थित होते. प्रा.वल्लभ केळकर यांनी नवनिर्वाचित प्रतिनिधींना शपथ दिली. प्रिया राऊत यांचेही समयोचित भाषण झाले. प्रास्ताविक प्राचार्य लक्ष्मीकांत परब यांनी केले. सूत्रसंचालन प्रा.प्रणिता गावकर, यांनी केले तर पाहुण्यांची ओळख प्रा.शिवानंद हिरोजी यांनी केला. प्रा.दयानंद कुंभार यांनी आभार मानले. राष्ट्रगीताने कार्यक्रमाची सांगता झाली.

विद्यार्थी मंडळ

निवडण्यात आलेले विद्यार्थी मंडळ पुढीलप्रमाणे ः निहिरा नाईक (सरचिटणीस), स्वराली वझे (सहायक सरचिटणीस, सर्वांगी अस्नोडकर (सांस्कृतिक सचिव), वेलन्सिया फर्नांडिस (सहायक सांस्कृतिक सचिव),सिद्देश गवस (क्रीडा सचिव), दक्ष फळदेसाई (सहायक क्रीडा सचिव), साहिल हळर्णकर, प्रजोल उस्कैकर, दीप गवस, हरीश देसाई, चेतन तळवणेकर आणि सुहान रेवणकर (सर्व वर्ग प्रतिनिधी) कशीष नार्वेकर, जिया परवार, प्राची गडेकर,रितिका सावंत,पूर्णिमा कुडास्कर आणि श्रेया परब (सर्व विद्यार्थिनी प्रतिनिधी).