Smart City Panaji: नेमकं चाललंय तरी काय? स्मार्ट सिटी पणजीत पुन्हा सापडले गांजाचे रोप

पणजी: स्मार्ट सिटीत पुन्हा एकदा गांजाचे रोप सापडल्याने गोंधळ उडाला आहे. जुन्या उत्पादन शुल्क मुख्यालयाजवळील परिसरात हे रोप सापडले. यासंबंधीची माहिती मिळताच घटनास्थळी पोहोचून पोलिसांनी हे रोप पंचनामा करुन ताब्यात घेतले. काही दिवसांपूर्वी, काकुलो मॉल परिसरात असेच गांजाचे रोप सापडले होते. त्यानंतर अमलीपदार्थ विरोधी पथकाने पूर्ण तपास करुन ते रोप गांजाचेच असल्याचे म्हटले होते. आता पुन्हा एकदा पणजी शहरात अशीच घटना घडली आहे.

दरम्यान, सापडलेले हे अमली पदार्थाचे रोप पोलिसांनी ताब्यात घेतले असताना आता पुन्हा हा प्रकार कसा काय घडला असा सवाल उपस्थित होत आहे. गांजाच्या या रोपांच्या बिया नेमके कोण आणून टाकते किंवा कधीपासून आणून टाकते असा सवालही उपस्थित केला जात आहे.

काही दिवसांपूर्वी पत्रकारांनी पणजीचे (Panaji) आमदार बाबूश यांच्याकडे पणजीत सलग दोनवेळा घडलेल्या या विचित्र प्रकाराबद्दल प्रश्न विचारला होता. त्यावर बाबूश म्हणाले होते की , "मी ती झाडं लावली आहेत का?, ती झाडं कोणी लावली हे शोधून काढा. मीच अशा प्रकारांना प्रोत्साहन देत असल्याप्रमाणे तुम्ही प्रश्न विचारात आहात."

तसेच, 6 जानेवारी रोजी संतीनेज परिसरात शीतल हॉटेल ते मधुबन जंक्शन रस्त्यावर असलेल्या झरीना टॉवरजवळ गांजाचे रोप सापडले होते. अंमली पदार्थ विरोधी पथकाने या रोपाचे परीक्षण करुन ते गांजाचेच असल्याचे सांगितले होते.