Calangute Gram Sabha: 'आम्हाला गावात शाश्वत विकास हवा', ODP ला उच्च न्यायालयात आव्हान

Calangute Gram Sabha: कळंगुट येथील ग्रामस्थांनी रविवारी विशेष ग्रामसभेत कळंगुटच्या बाह्यरेखा विकास आराखड्याला (ओडीपी) उच्च न्यायालयात आव्हान देण्याचा निर्णय घेतला आहे.

स्थानिकांनी याबाबत तीव्र विरोध दर्शवला असून गावासाठी हा आराखडा विनाशकारी ठरेल असे मत व्यक्त केले. सध्याचा ओडीपी कळंगुटमधील अनियोजित आणि आडकाठीचा विकास करू पाहत आहे.

आम्हाला गावात शाश्वत विकास हवा आहे आणि म्हणून हा ओडीपी आम्हाला मान्य नाही, असे ठाम बोल नागरिकांनी व्यक्त केले.

गावकऱ्यांना पाणी, वीज आणि योग्य रस्ते या मुलभूत गरजा पुरवण्यात सरकार अपयशी ठरले आहे, मात्र या ढिसाळ विकासातून मोठे प्रकल्प ते गावात आणू पाहात असल्याचा आरोप सरकारवर केला.

कळंगुटचे सरपंच जोसेफ सिक्वेरा म्हणाले की, इतरांकडे बोटे दाखवण्यात अर्थ नाही. आपण कळंगुटचे जे काही शिल्लक आहे ते वाचवू. ओडीपीच्या विरोधात उच्च न्यायालयात याचिका दाखल करण्याचा निर्णय ग्रामसभेने एकमताने घेतला.