बांबोळी येथील मनोरुग्ण इस्पितळात उपचार सुरू असलेल्या सामूहिक बलात्कार प्रकरणातील पीडित महिलेच्या जबानीवरून पोलिसांनी गुन्हा नोंद केला आहे. मात्र त्याचा तपास कोणी करायचा यावरून अजून निर्णय झालेला नाही.
हे प्रकरण कळंगुट पोलिसांनी पणजी महिला पोलिस स्थानकाकडे वर्ग केले असले तरी त्याची फाईल काल संध्याकाळपर्यंत पोहोचली नव्हती. त्यामुळे या प्रकरणाच्या तपासाबाबत टोलवाटोलवी सुरू आहे. सहा दिवस उलटले तरी संशयित मोकाट आहेत.
कळंगुट पोलिसांनी महिला पोलिस स्थानकाकडे वर्ग केलेली फाईल अजूनही आलेली नाही, अशी माहिती संबंधित अधिकाऱ्यांनी दिली. पीडित महिला ही मनोरुग्ण इस्पितळात उपचार घेत असून एनजीओंच्या मदतीने तिचे समुपदेशन करण्याचा प्रयत्न सुरू आहे.
या सामूहिक बलात्कारप्रकरणातील संशयितांना शोधण्याबाबत अजून तपासही सुरू झालेला नाही. ज्या दिवशी तिने सामूहिक बलात्कार झाल्याची जबानी दिली, त्यावेळी पोलिस यंत्रणेने या प्रकरणाचा तपास वेगाने सुरू करण्याची आवश्‍यकता होती. तिची न्यायदंडाधिकाऱ्यांसमोर जबानी नोंद व्हायला हवी होती, असे मत एका वरिष्ठ अधिकाऱ्याने व्यक्त केले.
गेल्या 22 फेब्रुवारीला ही पीडित महिला पणजी बसस्थानकावर लोकांवर दगडफेक करत असल्याने पणजी पोलिस स्थानकात आणून तिची जबानी नोंद करण्यात आली होती.
तिचे मानसिक संतुलन बिघडल्याने तिला मनोरुग्ण इस्पितळात दाखल केले. त्यानंतर तिची जबानी नोंद केल्यावर हा सामूहिक बलात्काराचा प्रकार उघडकीस आला आहे. पतीशी फारकत झाल्याने ती बॉयफ्रेंडसमवेत आली होती व त्याचेही मित्रही आले होते.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
