Goa Crime News: ग्राहकाला गांजा पुरवण्यासाठी आलेल्याच्या आवळल्या मुसक्या! कळंगुट पोलिसांची कारवाई

Goa Crime News: अमली पदार्थांच्या तस्करी प्रकरणी सिकेरी-कांदोळी भागात मध्यरात्री छापा टाकण्यात आला. यावेळी ग्राहकाला गांजा पुरवण्यासाठी आलेल्या संशयित इब्राहिम पस्तुनी (45, रामनगर-पर्वरी) याला पोलिसांनी रंगेहाथ पकडून अटक केली आहे. राज्यभरात अमलीपदार्थ विरोधी प्रकारांबाबत पोलिसांनी कारवाईचा बडगा उचलला आहे.

उपलब्ध माहितीनुसार, कांदोळी भागात अमली पदार्थ ग्राहकाला देण्यासाठी येणार असल्याची माहिती पोलिसांना सूत्रांकडून मिळाली होती. याप्रकरणी सापळा रचत पोलिसांनी इब्राहिमला अटक केली आहे. संशयिताकडून 92 हजार रुपयांचा 920 ग्रॅम गांजा जप्त करण्यात आला आहे.

सध्या संशयित इब्राहिम पस्तुनीची पोलीस कोठडीत रवानगी केली असल्याचे पोलिसांनी सांगितले. वरिष्ठ अधिकाऱ्यांच्या मार्गदर्शनाखाली पुढील तपास सुरू आहे.

पुढील तपास कळंगुट पोलीस स्थानकाचे पोलीस निरीक्षक परेश नाईक, यांच्या देखरेखीखाली सुरू आहे.