खोट्या तक्रारीद्वारे खंडणी उकळणाऱ्या सेक्स रॅकेटचा पर्दाफाश; गुजरातमधील दोन महिलांसह तिघांना अटक

Police Arrested Two Females From Gujarat For Honey Trapping: बलात्काराची तक्रार करण्याची धमकी देऊन व्यावसायिकांकडून खंडणी उकळणाऱ्या टोळीचा पर्दाफाश करण्‍यात आला आहे. या प्रकरणी गुजरातमधील दोन महिलांसह एका पुरुष साथीदाराला कळंगुट पोलिसांनी आज सोमवारी अटक केली.

त्‍यांनी फिर्यादी किरण पटेल (गुजरात) यांच्याकडून 2 लाखांची खंडणी उकळली होती. संशयितांविरोधात गुन्हा नोंदविण्यात आला आहे.

या महिलांनी फिर्यादीसोबत मैत्री प्रस्थापित केली व खंडणीच्या उद्देशाने त्‍यांनी फिर्यादीला बलात्काराची खोटी तक्रार करण्याची धमकी देत त्याच्याकडून 2 लाख रुपये घेतले.

चौकशीदरम्यान या महिलांनी आपल्या पुरुष साथीदाराचे नाव उघड केले. त्यानुसार पोलिसांनी विश्‍‍वदीप गोहिल याच्‍या मुसक्‍या आवळल्‍या.

प्रकरणाचा असा झाला उलगडा

कोलवाळ पोलिस स्थानकात दि. २३ ऑगस्ट रोजी आपल्यावर बलात्कार झाल्याची तक्रार अटक केलेल्यापैकी एका महिलेने दिली. त्यानुसार पोलिसांनी तपास सुरू केला. याच महिलेने मानवी तस्करीविरोधी पथकाकडेही अशीच तक्रार दिली होती.

पोलिस निरीक्षक विजय राणे यांनी याप्रकरणी सखोल तपास करून गुजरातमध्ये चौकशी केली व माहिती मिळविली. यावेळी याच महिलांनी गुजरातमध्येही अशाच तक्रारी केल्‍याचे उघडकीस आले.

त्‍यातच एका व्यावसायिकाने कळंगुट पोलिसांशी संपर्क साधून दोन महिलांनी आपल्यावर बलात्काराची खोटी तक्रार करण्याची धमकी देऊन दोन लाख खंडणी उकळल्याचे सांगितले. त्यानुसार पोलिसांनी तपासाची दिशा बदलली आणि या रॅकेटचा पदार्फाश केला.