Panjim: कालवी नदीतील बस दुर्घटना प्रकरणातील चालक राजेश नाईक याला सत्र न्यायालयाने तांत्रिक बाबींच्या त्रुटीवरून निर्दोष ठरवलेल्या निवाड्याला आव्हान देण्याबाबत सरकारी वकील व पोलिस यांच्याकडून हालचाली सुरू झाल्या आहेत.
या अपघातात चार शालेय विद्यार्थ्यांसह सहाजणांचा मृत्यू झाला होता. या खटल्यावरील सुनावणीत संशयिताला निर्दोष ठरवल्याने मृत्यू झालेल्यांच्या कुटुंबीयांनी पोलिसांनी केलेल्या तपासकामाबाबत संताप व्यक्त केला आहे.
यासंदर्भात माहिती मिळविली असता या निवाड्याच्या अधिकृत प्रतीसाठी सरकारी वकिलांनी अर्ज केला आहे. ती मिळताच पुढील प्रक्रिया केली जाईल. त्याची प्रत संबंधित पोलिस स्थानक प्रमखामार्फत उत्तर गोवा पोलिस अधीक्षकांना पाठविली जाईल.
पोलिस व सरकारी वकिलांच्या मतप्रदर्शनानुसार आव्हान देण्यासाठी ती अभियोग संचालकांकडे त्यांच्या मतांसाठी जाणार आहे. त्यांनी त्यास मंजुरी देताच उच्च न्यायालयात आव्हान दिले जाईल, असे एका पोलिस अधिकाऱ्याने सांगितले.
तत्कालीन न्यायदंडाधिकारी मिहीर वर्धन यांनी बसचालक राजेश नाईक याची फौजदारी प्रक्रिया संहितेखाली कलम 64(4) नुसार जबानी नोंद करण्यापूर्वी आवश्‍यक असलेली पूर्तता पूर्ण केली नाही. बसला ब्रेक होते, की नव्हते तसेच जर होते, तर ते कार्यरत होते का? याचा ठोस पुरावा आरटीओ अधिकाऱ्यांनी बसची तपासणी करताना न्यायालयातील उलटतपासणीवेळी सादर करू शकले नाहीत.
तपासातील गंभीर त्रुटी आणि काही साक्षीदारांच्या विरोधाभासी विधानांमुळे कारोना जेटीजवळ कालवी नदीत बस जाऊन झालेल्या दुर्घटनेच्या आरोपातून सत्र न्यायालयाने बसचालकाला निर्दोष ठरवले होते. त्याला निर्दोष ठरविल्यानंतर मृत्यू झालेल्या कुटुंबीयांनी संतापजनक प्रतिक्रिया व्यक्त केल्या होत्या.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
