बोरी पंचायत क्षेत्रातील इस्कॉन प्रकल्पासाठीच्या रस्त्याचे काम त्वरित बंद करा, अशी मागणी करीत ग्रामस्थांनी पंचायत मंडळ सदस्यांना धारेवर धरले. शनिवारी इस्कॉनचे प्रतिनिधी या प्रकल्पासंबंधी माहिती देण्यासाठी पंचायतीत आले होते;
पण ग्रामस्थांनी त्यांचे म्हणणे न ऐकता हा प्रकल्प रद्द केल्याचे पत्र द्या, अशा धोषा सरपंचांकडे लावला. शेवटी पोलिस बंदोबस्तात सरपंच दुमिंग वाझ व इतर पंचांना पंचायतीबाहेर काढले. सद्यस्थितीत रस्ता काम बंद ठेवण्याचा आदेश पंचायतीने दिला आहे.
बोरी पंचायत क्षेत्रात इस्कॉनचा प्रकल्प होत असून त्यासाठी सर्व खात्यांचे परवाने घेतले आहेत. या प्रकल्पासाठी सार्वजनिक बांधकाम खात्यातर्फे रस्ता करण्यात येत असून याला काही ग्रामस्थांचा विरोध आहे. बोरी पंचायतीत ४ रोजी या ग्रामस्थांनी प्रकल्पाला व रस्त्याला विरोध असल्याचे पत्र दिले होते. इस्कॉनच्या प्रतिनिधींना पंचायतीत ग्रामस्थांना माहिती देण्यासाठी बोलावले होते.
सरपंच वाझ म्हणाले, गेल्या ग्रामसभेत चार रोजी या प्रकल्पासंबंधी लोकांनी आक्षेप नोंदवला आहे. 16 तारखेला पंचायतीची पाक्षिक बैठक होणार असून यावेळी जे काही ठरते ते सांगतो, असे सांगितले.
तरीही ग्रामस्थ ऐकण्याच्या तयारीत नव्हते. त्यामुळे पंचायतीने रस्ता काम बंद करण्यात येईल, असे आश्‍वासन दिले. यावर लोकांचे समाधान झाले नाही. शेवटी सरपंच व पंचांना पोलिस बंदोबस्तात बाहेर काढले. यावेळी ग्रामस्थांनी रस्ता काम बंद केले.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.