Goa Tourism: ''केवळ समुद्रकिनारे ही गोव्याची ओळख नाही, तर...''; दिल्लीतील परिषदेतून जीटीडीसीची पर्यटकांना साद

केवळ सागरकिनारे ही गोव्याची ओळख नाही, तर त्याच्याही पलीकडे जाऊन गोवा राज्यात पर्यटनाचे विविध पैलू आहेत. या पैलूंची ओळख सर्वांना व्हावी व जास्तीत जास्त पर्यटकांनी गोव्यात यावे, या दृष्टीने आम्ही प्रयत्न करीत आहोत, असे गोवा टुरिझमचे मार्केटिंग विभागाचे व्यवस्थापक प्रवीणकुमार फळदेसाई यांनी शुक्रवारी बीएलटीएम परिषदेदरम्यान प्रतिनिधीशी बोलताना सांगितले.

दिल्लीतील इंडिया इंटरनॅशनल कन्व्हेन्शन अँड एक्स्पो सेंटर, ‘यशोभूमी’ मध्ये सुरू असलेल्या बीएलटीएम परिषद आणि प्रदर्शनात गोवा टुरिझमने सहभाग घेतला आहे. पर्यटन, ट्रॅव्हल, हॉटेल उद्योगाशी संबंधित जगभरातील कंपन्या आणि विविध राज्यांच्या पर्यटन विभागांनी या प्रदर्शनात सहभाग घेतला आहे. वैविध्यपूर्णता आणि आलिशान सोयी सुविधा यासाठी गोव्याचा पर्यटन उद्योग ओळखला जातो. भव्य रेसॉर्टस, उत्कृष्ट जेवण, समृध्द सांस्कृतिक वारसा ही गोव्यातील पर्यटनाची ओळख आहे, असे फळदेसाई म्हणाले.

नोव्हेंबर २०२४ ते जानेवारी २०२५ या कालावधीत होणाऱ्या सेंट फ्रान्सिस झेवियर एक्सपोझिशनची माहिती प्रदर्शनात देण्यात आली आहे. एकादश तीर्थ सर्किट हे गोव्याचे वैशिष्ट्य बनले आहे. या संधीचा लाभ टूर ऑपरेटर्सनी घ्यावा, असा संदेश देण्यात आला आहे, असे फळदेसाई यांनी नमूद केले.