Bicholim News : विक्रमी मताधिक्यामुळे साखळीत भाजपचे ‘बळ’ वाढले : भाजप मंडळाचा दावा

डिचोली, मुख्यमंत्री डॉ. प्रमोद सावंत यांच्या साखळी मतदारसंघाने उत्तर गोव्यातून निवडून आलेले श्रीपाद नाईक यांच्या विजयात मोठे योगदान दिले आहे. साखळीतून श्रीपाद नाईक यांना विक्रमी आघाडी मिळवून देताना, विजयी परंपरा राखून ठेवली आहेच.

शिवाय मुख्यमंत्र्यांचे स्थान आणखी बळकट केले आहे, असा दावा भाजप मंडळाचे अध्यक्ष तथा ‘झेडपी’ गोपाळ सुर्लकर, प्रभारी प्रा. संतोष मळीक यांनी पत्रकार परिषदेत केला.

साखळीत मिळालेले विक्रमी मताधिक्य ही केंद्रातील नरेंद्र मोदी सरकार आणि स्वतः मुख्यमंत्री डॉ. सावंत यांनी केलेल्या कार्याची मतदारांनी दिलेली पावती आहे. कार्यकर्त्यांची मेहनत आणि मतदारांचा पाठिंब्यामुळेच हे शक्य झाले, असे गोपाळ सुर्लकर यांनी सांगून कार्यकर्ते आणि मतदारांचे अभिनंदन केले. बुधवारी (ता.५) सायंकाळी डिचोलीत घेतलेल्या पत्रकार परिषदेवेळी महिला मोर्चाच्या राज्य उपाध्यक्ष स्वाती माईणकर, भाजप मंडळाचे सरचिटणीस गुरुप्रसाद नाईक, पांडुरंग कुट्टीकर आणि सुनील सिनारी उपस्थित होते.

निवडणूक नव्हे महोत्सव

साखळी मतदारसंघात विरोधकांची सफाई होताना श्रीपाद नाईक यांना १९ हजार ४२६ मते मिळून मताधिक्य १५ हजार ७६४ इतके मिळाले. यावरून साखळीतील भाजपची ताकद दिसून येते. मतदारसंघात येणाऱ्या प्रत्येक पंचायत क्षेत्रात भाजपला ८० ते ८५ टक्के मते मिळाली आहेत, असे गोपाळ सुर्लकर यांनी सांगितले.

साखळीत मिळालेल्या विक्रमी मताधिक्यात महिलांचाही वाटा मोठा आहे. महिलांनी प्रचारात सक्रिय भाग घेतला. मतदानाच्या दिवशी तर प्रत्येक बुथवर महिला एखाद्या महोत्सवाप्रमाणे वावरल्या. त्याचा फायदा झाला, असे महिला मोर्चाच्या उपाध्यक्ष स्वाती माईणकर यांनी सांगून, सर्व महिला कार्यकर्त्या आणि मतदारांना धन्यवाद दिले.