भाजपने मला लक्ष्य केलेय: मायकल लोबो

कळंगुट: मला व काँग्रेसला संपविण्यासाठी सरकारने आराडी पर्रातील जमिनीचा खोटा मुद्दा पुढे करून आपल्याला टार्गेट करण्यात येत असल्याचा आरोप कळंगुटचे आमदार तथा विरोधी पक्ष नेते मायकल लोबो यांनी पत्रकार परिषदेत केला.

मंत्री विश्‍वजीत राणे यांनी केंद्रातील वरिष्ठांना खूष करण्यासाठी होलीकाऊ बनण्याचा प्रयत्न करू नये असा टोलाही त्यांनी लगावला. ‘राणे यांच्याकडून आपण व आपल्या पत्नीविरोधात विरोधात म्हापसा पोलिसांत नगरनियोजन कायदा कलम 17 (अ) तसेच 17 (ब) चे उल्लंघन केल्याचा आरोप करीत तक्रार दाखल करण्यात आली आहे. ती तक्रार अर्थहीन आहे. आराडी पर्रा येथील सर्वे क्र : 10/9 आणि 10/10 मधील शेतजमीन सर्व कायदेशीर सोपस्कारानंतर खरेदी करण्यात आली. त्या जमिनीचा वापर फार्म हाऊससाठी स्थानिक भाजीपाला तसेच पर्रातील प्रसिद्ध कलिंगडे पिकविण्यासाठी करण्यात येणार असल्याचे लोबो यांनी यावेळी सांगितले.