महिलांच्या सुरक्षेची ‘गॅरंटी’ देण्यात भाजप सरकार अपयशी ठरल्याचा आरोप गोवा महिला प्रदेश काँग्रेसने शुक्रवारी केला.
गोवा प्रदेश काँग्रेस समितीच्या अध्यक्षा बीना नाईक यांनी शुक्रवारी काँग्रेस कार्यालयात पत्रकार परिषद घेऊन महिलांवरील वाढत्या गुन्हेगारीवर भाजप सरकारवर टीका केली. यावेळी उपाध्यक्ष डॉ.प्रमोद साळगावकर, सरचिटणीस लिबी मदेरा उपस्थित होत्या.
'भाजप सरकारच्या काळात महिलांवरील गुन्हे वाढत आहेत. भाजपने देशभरातील बलात्कारी आणि गुन्हेगारांना संरक्षण दिले आहे. आपल्या देशात दर सतरा मिनिटाला स्त्रीवर बलात्कार होतो. दररोज तीन महिलांची तस्करी होते आणि हुंड्यासाठी प्रत्येक 84 मिनिटांत एका वधूची हत्या केली जाते. तर, दर महिन्याला 12 महिलांवर ॲसिड हल्ला होतो,' असे बीना नाईक म्हणाल्या.
भाजप ‘बेटी बचाओ बेटी पढाओ’ची घोषणा देतात, पण भाजपच्या राजवटीत मुली आणि महिला सुरक्षित नाहीत, असा आरोप नाईक यांनी केला.
भाजपचे सर्वाधिक खासदार आणि आमदारांवर महिलांविरोधातील गुन्हे दाखल आहेत. मणिपूरमध्ये हिंसाचाराच्या काळात महिलांचे संरक्षण करण्यात भाजप अपयशी ठरले.
गोव्यातही महिलांविरोधात गुन्हे घडत आहेत. त्यामुळे या सरकारला सत्तेतून बाहेर काढले पाहिजे, असे नाईक म्हणाल्या.
कौटुंबिक हिंसाचाराच्या घटनांमध्येही वाढ होत आहे. कायदे असतानाही महिला घरात आणि बाहेरही सुरक्षित नाहीत, असे डॉ. प्रमोद साळगावकर म्हणाल्या.
महिलांसाठी ‘संरक्षण अधिकारी’ नेमण्यात सरकार अपयशी ठरले असून, या प्रश्नांबाबत सरकार गंभीर नाही, असे त्या म्हणाल्या.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.