Goa BJP: एसटी समाजाला भाजपनेच दिला न्याय; बार्बोझा

पणजी: गोव्यातील एसटी बांधवांना न्याय देण्याचे काम सदोदीत केवळ भाजपने केले आहे. गावडा, कुणबी, वेळीप समाजाला एसटीचा दर्जा, विविध सरकारी योजना तसेच आता एसटीला राजकीय आरक्षण देण्यासाठी भाजपनेच पुढाकार घेतला आहे. काँग्रेसने एसटी समाजासाठी काही केले नाही. केवळ समाज बांधवांत फूट पाडण्याचे काम केल्याचा आरोप भाजप एसटी मोर्चाचे ॲन्थनी बार्बोझा यांनी केला.

भाजप कार्यालयात आयोजित पत्रकार परिषदेत ते बोलत होते. यावेळी एसटी मोर्चाचे अध्यक्ष प्रभाकर गावकर, धाकू मडकईकर, सुरेश केपेकर, मोहन गावकर, गोपाळ सुर्लकर उपस्थित होते. बार्बोझा पुढे म्हणाले, की ज्यावेळी मुख्यमंत्री डॉ. प्रमोद सावंत एसटी समाजाच्या नेत्यांसह गृहमंत्री अमित शहा यांना भेटले

त्यानंतर परत गोव्यात येऊन मिशन पॉलिटिकल रिझर्व्हेशनच्या पुढाऱ्यांनी तसेच काँग्रेसने उलट्या पत्रकार परिषदा घेत अपप्रचार केला. मात्र, लोकसभा निवडणुकीनंतर आरक्षण देण्याचा भाजपने दिलेला शब्द पाळला.

‘समाजाने भाजपसोबतच रहावे’

मी ‘गोमन्तक वृत्त वाहिनी’वरील मुलाखतीत पूर्वी सांगितले होते की, आजपर्यंत भाजपनेच आम्हाला न्याय दिला आहे. राजकीय आरक्षण देखील भाजपच देईल. एसटी समाजाला जर कोणी न्याय दिला असेल, तर तो भाजपने दिला आहे. त्यामुळे एसटी समाजाने सदोदीत भाजपसोबत राहणे गरजेचे असल्याचे प्रतिपादन धाकू मडकईकर यांनी केले.