BITS Pilani विद्यार्थी मृत्यू प्रकरणात मोठा ट्विस्ट; उलटीत सापडले तीन प्रकारचे ड्रग्ज, घटनेचे गूढ वाढले

वास्को: बिट्स पिलानी कॅम्पसमध्ये २० वर्षीय विद्यार्थ्याच्या मृत्यूप्रकरणाचा गूढ अधिक वाढले आहे. ऋषी नायर याच्या उत्तरीय तपासणीतून धक्कादायक माहिती समोर आली. या माहितीमुळे घटनेत मोठा ट्विस्ट निर्माण झाला आहे. ऋषीच्या उलटीत तीन प्रकारचे ड्रग्ज सापडल्याने घटनेचे गूढ वाढले आहे.

ऋषी नायर (२०) या मूळ बंगळुरू येथील विद्यार्थ्यांचा बिट्स पिलानी कॅम्पसमध्ये मृतदेह आढळून आला होता. याप्रकरणामुळे गोव्यासह देशभरात खळबळ निर्माण झाली होती. नऊ महिन्यात पाच विद्यार्थ्यांनी कॅम्पसमध्ये जीवन संपवल्याने ही घटना अधिक गंभीर मानली जात होती. नायरने आत्महत्या केल्याचा संशय सुरुवातीला व्यक्त करण्यात आला तर, तो मानसिक तणावाखाली असल्याचा देखील निष्कर्ष काढला जात होता.

दरम्यान, दक्षिण गोवा जिल्हा रुग्णालयात त्याचा मृतदेह उत्तरीय तपासणीसाठी पाठविण्यात आला होता. या तपासणीचा अहवाल आता समोर आला असून, यातून धक्कादायक माहिती समोर आली आहे.

ऋषी नायरच्या उलटीत तीन प्रकारच्या अमली पदार्थाचा अंशा आढळून आला आहे. नायरच्या उलटीत ओल्पिडेम (ZOLP), मेथापेटामाईन (MAMP) आणि एमडीएमए असे तीन प्रकारचे ड्रग्ज आढळून आले आहेत. नायरने केलेल्या उलटीची तपासणी गोमेकॉतील रॅन्डॉक्स मशीनद्वारे करण्यात आली आहे.

नायरच्या उलटीत ड्रग्ज आढळून आल्याने आता बिट्स पिलानी कॅम्पसमध्ये ड्रग्ज पोहोचवले जात होते, हा संशय बळावला आहे. यापूर्वी कॅम्पसमध्ये सिगारेट देखील पोहोचवले जात होते अशी माहिती समोर आली होती. दरम्यान, प्रशासनाने याबाबत शक्यता नाकारली होती. दरम्यान, नायरच्या उलटीत सापडलेल्या ड्रग्जच्या अंशामुळे हा संशय बळावला आहे.

ऋषी नायर त्याच्या मूळ गावी असताना तो एक मुलीच्या प्रेमात होता. दरम्यान, त्याच्या या प्रेयसीने अचानाक जीवन संपविल्याने ऋषी मानसिक तणावाखाली होता. या काळात त्याला कॅम्पसमध्ये मानसिक समुपदेशन किंवा तत्सम प्रकारची मदत न मिळाल्याचे देखील सांगितले जाते. आता नायरच्या अहवालातून समोर आलेल्या नव्या माहितीमुळे या प्रकरणाचे गूढ वाढले आहे.