Birthday Of Almond Tree : डिचोलीत 'बदामा' च्या झाडाचा 'बर्थ डे'

Bicholim : पर्यावरण जतनाचा संदेश देत गेल्या सहा वर्षांपासून चक्क ''बदामा''च्या झाडाचा वाढदिवस साजरा करण्यात येत आहे. येथील बसस्थानकाबाहेर मोकळ्या जागेत सहा वर्षांपूर्वी पालिकेने लावलेले ''बदामा''चे झाड आता सहा वर्षांचे झाले आहे.

विद्यार्थी आणि पर्यावरणमोगीच्या उपस्थितीत आज (मंगळवारी) या झाडाचा सहावा वाढदिवस मोठ्या उत्साहात साजरा करण्यात आला. या आगळ्यावेगळ्या सोहळ्याला प्रमुख पाहुणे म्हणून आमदार डॉ. चंद्रकांत शेट्ये उपस्थित होते. त्यांच्याच हस्ते केक कापून `बदामा'चा वाढदिवस साजरा करण्यात आला.

मुलाप्रमाणे काळजी घ्या

जागतिक पातळीवर होणारी तापमानवाढ लक्षात घेता, झाडे लावणे आणि त्यांचे संगोपन करणे. ही काळाची गरज आहे. प्रत्येकांनी झाडांची मुलांप्रमाणे काळजी घ्यावी. असे आवाहन आमदार डॉ. शेट्ये यांनी करुन झाडाचा वाढदिवस साजरा करण्याच्या आगळ्यावेगळ्या संकल्पनेचे त्यांनी कौतुक केले. कुंदन फळारी, सचिन देसाई आणि अॅड. अपर्णा फोगेरी यांनी यावेळी झाडांचे महत्व विषद करून, वाढदिवस उपक्रम आयोजित करणाऱ्या आयोजकांचे अभिनंदन केले.

विद्यार्थ्यांना शालेय साहित्य

झाडाचा हा वाढदिवस कुटुंबातील एखाद्या सदस्याच्या वाढदिवसा प्रमाणे साजरा करण्यात आला. वाढदिवस सोहळ्यात नागरिक उत्साहात सहभागी झाले होते. बदामाच्या झाडांची काळजी घेणाऱ्या तेथील दुकानदारांचा यावेळी आमदारांच्या हस्ते सत्कार करण्यात आला. या झाडाच्या वाढदिवसानिमित्त आयोजकांतर्फे मुलांना फुलझाडांची रोपटी तसेच शालेय साहित्य वितरित करण्यात आले. अब्बास रिश्ते यांनी स्वागत केले. सूत्रसंचालन समृद्धी गणपुले यांनी केले.