Bhutani Project: डोंगर जपा, विकू नका! सांकवाळ पंचायत 'भुतानी'विरुद्ध आक्रमक

Bhutani Infra Project Sancoale Panchayat Meeting

वास्को: सांकवाळ येथील प्रस्तावित भूतानी प्रकल्पाला आज पंचायत बैठकीत कडाडून विरोध करण्यात आला. येथील डोंगराळभाग जपा, दिल्लीवाल्यांना विकू नका, असा सूर व्यक्त करण्यात आला.

सांकवाळ (Sancoale) पंचायतीच्या बैठकीत उपस्थित सर्व पंच सदस्यांनी एकमताने प्रमेश कंट्रक्शन भूतानी इन्प्राच्या प्रकल्पाला कारणे दाखवा नोटीस बजावली आहे. सदर बैठकीला सरपंच रोहिणी तोरस्कर, पंच अनुषा लमाणी, गिरीश पिल्ले, संतोष देसाई, डॅरिक वालिस, वॅलेटिनो रॉड्रिगीस, जसिया कादर, मारिया पॉवलिना आझावेदो, निधी नाईक, मॉव्हिलो काव्हालो, तुळसीदास दत्ता नाईक, ग्राम सेवक सचिव ओरविल वालिस व मोठ्या प्रमाणात ग्रामस्थ, सामाजिक कार्यकर्ते उपस्थित होते.

बैठक सुरू होताच विरोधी पंच सदस्य तुळसीदास नाईक यांनी भूतानी इन्फ्रा प्रकल्पाला दिलेला परवाना मागे घेण्याची मागणी केली. यावेळी विरोध पंच सदस्य मॉव्हिलो काव्हालो, निधी नाईक, मारिया पॉवलिना आझावेदो यांच्यांनी सुद्धा भूतानी इन्फ्रा प्रकल्पाला तीव्र विरोध दर्शविला. सदर बैठकीत बेकायदेशीररित्या एक वकिल पंच सदस्यांच्या जागेवर बसून सत्ताधारी पंचाना मार्गदर्शन करीत होता. त्याला पंच तुळसीदास नाईक यांनी आक्षेप घेतला.