Bhoma Road Issue: "देव खाप्रेश्वराला बाजूला केले, आता आमच्या देवदेवतांनाही बाजूला करण्याचे षडयंत्र सुरू", भोमवासीयांना सावध राहण्याचं आवाहन

फोंडा: भोमवासीयांचे रक्त जमिनीवर सांडू देऊ नका, गावाचे अस्तित्व राखण्यासाठी उभारलेला लढा कधीच मागे घेतला जाणार नाही, शरीरात रक्ताचा थेंब असेपर्यंत हा लढा सुरूच राहील, असा निर्धार रविवारी भोम येथे आयोजित करण्यात आलेल्या भोमवासीयांच्या सभेत घेण्यात आला. भोमवासीयांना गावातून चौपदरी रस्ता नको, बगल मार्ग हवा आहे, असा पुनरूच्चार करीत भोमवासीयांची एकजूट कायम राहील, अशी ग्वाही दिली.

भोम येथील या सभेत संजय नाईक, रामा काणकोणकर, डॉ. रुबिन डिसोझा तसेच वामन प्रियोळकर किशोर नाईक, शांतू भोमकर, मारियान व इतरांनी आपले विचार व्यक्त करताना गावातून चौपदरी महामार्ग नकोच, आम्हाला बगल मार्ग हवा असल्याचा पुनरूच्चार केला.

संजय नाईक यांनी भोमवासीयांचा हा लढा अखंड आहे, त्यात फूट घालण्याचा कुणीही प्रयत्न केला तरी हा लढा सुरूच राहणार असल्याची ग्वाही देत बिल्डर लॉबीसाठी सरकारने भोम गाव गहाण टाकू नये. भोम गावचे अस्तित्व राखण्यासाठी भोमवासीय एकजुटीने काम करीत असून शेवटपर्यंत ही एकजूट कायम राहील, असे सांगितले.

डॉ. रुबीन डिसोझा म्हणाले की, खोर्ली आणि भोम गावाच्या अस्तित्वावर संकट आले आहे. चौपदरी महामार्ग करताना गावातील वाहतुकीसाठी बाजूला सात मीटर रस्ता सोडण्यात येईल. मात्र ही जमीन कुठे आहे, याप्रकरणी सरकारला जाब विचारूया.

रामा काणकोणकर यांनीही गावाच्या अस्तित्वासाठी एकजुटीने पुढे या असे आवाहन करताना कुणीही फूट घालण्याचा प्रयत्न केला तरी तो सफल होणार नाही, असे सांगितले. यावेळी शांतू भोमकर तसेच वामन प्रियोळकर, किशोर नाईक व इतरांनी आपले विचार व्यक्त करताना भोमातून चौपदरी रस्ता नकोच, असा धोषा लावला.

खाप्रेश्‍वर देवासारखी स्थिती होईल...

पर्वरी येथील देव खाप्रेश्‍वराला बाजूला केले, त्याप्रमाणे गावातील देवदेवतांनाही बाजूला करण्याचे षडयंत्र सध्या सुरू आहे. त्यामुळे भोमवासीयांनी सावध व्हावे आणि या लढ्याला पूर्ण पाठिंबा द्यावा, असे आवाहन उपस्थितांनी केले. देव खाप्रेश्‍वराचा कोप संबंधितांवर झाल्याशिवाय राहणार नाही, असेही यावेळी भोमवासीयांनी सांगितले.

दामू नाईक यांनी भोम गावात यावे!

भारतीय जनता पक्षाचे नूतन अध्यक्ष दामू नाईक यांनी भोम गावात यावे आणि येथील स्थिती पाहावी, अशी मागणी यावेळी करण्यात आली. दामू नाईक यांनी गोमंतकीयांच्या हिताचे निर्णय घेण्यात येईल असे सांगितले आहे. मात्र, भोमवासीयांवर सरकारकडून घाला घातला जात आहे. आमच्यासोबत भोमातील नियोजित रस्त्यासंबंधी ‘डिबेट’ करा असे आव्हानही यावेळी भोमवासीयांकडून देण्यात आले.