कळंगुटमध्ये भाऊसाहेब बांदोडकर जयंती उत्साहात

कळंगुट: राज्यात काँग्रेसचे सरकार स्थापन्न करण्यासाठी आमचे प्रयत्न होते, परंतु या शर्यतीत आम्ही मागे पडलो आहोत. त्यामुळे सध्यातरी आमच्यापुरती ही शर्यत संपलेली आहे. मतदारांच्या विश्वासाला पात्र राहून एक सच्चा कॉँग्रेस कार्यकर्ता म्हणून मी कार्यरत राहणार असून कळंगुटबरोबरच राज्यातील प्रत्येक मतदार संघातील समस्यांना धरणे, आंदोलनाद्वारे वाचा फोडणार आहे, असे आमदार मायकल लोबो यांनी सांगितले.

भाऊसाहेब बांदोडकर यांच्या जयंतीनिमित्ताने आयोजित विशेष कार्यक्रमात लोबो बोलत होते. कळंगुटचे सरपंच शॉन मार्टीन्स, उपसरपंच शेरॉल लोबो, श्री बाबरेश्वर देवस्थानचे अध्यक्ष चंद्रकांत चोडणकर, सामाजिक कार्यकर्ते एकनाथ नागवेंकर, पंचायत मंडळाचे इतर सदस्य आदी मान्यवर उपस्थित होते.

विधानसभा निवडणुकीत जनतेने काँग्रेसला नाकारण्याचे कारण विचारले असतां लोबो म्हणाले, आपण काँग्रेस पक्षात नवीन असल्याने यावर पक्षाच्या वरिष्ठांनी अधिक भाष्य करणेच योग्य ठरेल. परंतु तिसवाडी बार्देश पेक्षा कॉँग्रेस दक्षिणेत विशेष करून सासष्टीत कमी पडली. भाऊसाहेब बांदोडकरांमुळे गरीब जनतेला मुंडकार कायद्याद्वारे राहत्या घराचा हक्क आणि कसेल त्याची जमीन कायद्याद्वारे शेताचा मालकी वाटा प्राप्त झाला. भाऊसाहेब बांदोडकर ट्रस्टचे डायस, प्रतिभा नार्वेकर, सरपंच शॉन मार्टीन्स, चंद्रकांत चोडणकर यांची भाऊसाहेबांच्या जीवनावर प्रकाशझोत टाकणारी भाषणे झाली. सूत्रसंचालन सामाजिक कार्यकर्ते एकनाथ नागवेकर यांनी केले.