Bhandari Community In Goa: भंडारी समाजाचे कार्यालय फोडायचे आहे का? अध्यक्ष नाईक यांची विचारणा

पणजी: फोंडा येथे रविवारी स्नेहमेळावा घेऊन भंडारी समाज कार्यालयावर मोर्चा काढण्याचा इशारा देणाऱ्यांना समाजाचे कार्यालय फोडायचे आहे का, अशी विचारणा गोमंतक भंडारी समाजाचे अध्यक्ष अशोक नाईक यांनी ‘गोमन्तक’शी बोलताना केली.

अशा कृतीतून समाजाचेच नुकसान होईल. समाजाच्या समितीची मुदत नोव्हेंबरपर्यंत असल्याने त्याआधी त्याबाबत विचार कसा करता येईल, अशी विचारणाही त्यांनी केली. त्यांच्या समितीला पायउतार होण्यासाठी समाजबांधवांनी १० दिवसांची मुदत दिली आहे. अन्यथा अस्थायी समिती नेमण्यासह कार्यालयावर मोर्चा काढण्याचा इशारा दिला आहे.

बदनामी करायची नाही. ज्यांना समाजाच्या चार भिंतींच्या आत राहायच्या गोष्टी जाहीरपणे चर्चा करायच्या आहेत, ते तसे करण्यास मोकळे आहेत. या मेळाव्याचा कसा प्रतिवाद करायचा, याचा निर्णय घेतलेला नाही. या आठवड्यात शुक्रवारी किंवा शनिवारी समाजाच्या कार्यकारी समितीची बैठक घेऊन त्याबाबत निर्णय घेतला जाणार आहे.

आम्हाला संघर्ष नको आहे. याचा अर्थ बेकायदेशीर गोष्टी कराव्यात, असाही होत नाही. मोर्चा काढून कोणाला कार्यालय फोडायचे आहे का? त्याने समाजाचेच नुकसान होईल. आम्हाला कोणाविषयी आकस नाही. जे काही करायचे ते समाजासाठी करायचे, असे आमचे धोरण आहे. गेले सहा वर्षे मी समाजाच्या भल्यासाठी झटलो. १२ तालुक्यांतील कोणालाही विचारल्यास हे समजून येईल.

आमच्या समितीची मुदत नोव्हेंबरपर्यंत

आमच्या समितीची मुदत नोव्हेंबरपर्यंत आहे. त्याचमुळे बेकायदेशीरपणे बोलावलेल्या आमसभेला आणि निवडणुकीला स्थगिती दिली आहे. न्यायालयाचा निवाडा हाच आमची समिती वैध आहे हा पुरावा आहे आणि तो सर्वांनीच मान्य केला पाहिजे. समाजाचे नुकसान होईल असे कोणी वागता कामा नये. जाहीर आरोप-प्रत्यारोपांतून काही साध्य होणार नाही, असे नाईक म्हणाले.