Betki Health Centre Issues: बेतकी प्राथमिक आरोग्य केंद्र ‘आयसीयू’मध्‍ये; आवश्‍‍यक सुविधांचा अभाव

पणजी: प्रियोळ मतदारसंघातले बेतकी प्राथमिक आरोग्य केंद्र समस्याग्रस्त बनले आहे. डॉक्टर्स व इतर वैद्यकीय कर्मचाऱ्यांची कमतरता असल्याने रुग्णांची मोठी गैरसोय होत आहे. उपचारांसाठी आलेल्या रुग्णांना तासन्तास ताटकळत बसावे लागते. सर्दी, ताप, खोकला या दैनंदिन आजारांसोबत अपघातांच्या घटनांमध्येही दिवसेंदिवस मोठ्या प्रमाणात वाढ झालेली असताना डॉक्टरांची कमतरता मोठी अडचण ठरतेय.

बेतकी, तिवरे वरगाव, भोम-आडकोण, वळवई, वेरे-वाघुर्मे, केरी या पंचायत क्षेत्रातील लोकांसाठी बेतकी आरोग्य केंद्र अतिशय महत्वाचे आहे. गोव्याची माजी मुख्यमंत्री शशिकला काकोडकर यांच्‍या काळातील ह्या आरोग्य केंद्राची जुनी इमारतीची जागाही आता अपुरी पडतेय. ह्या सगळ्यामुळे केंद्रात आलेले रुग्ण आणि सुरक्षा रक्षकांमधील बाचाबाचीच्या घटना आता नित्याच्याच बनल्या आहेत.

लाखो रुपये खर्चून पायाभरणी इव्हेंट; मात्र...

लाखो रुपये खर्चून बेतकी आरोग्य केंद्राच्या नव्या इमारतीचा पायाभरणी सोहळा पार पडला होता. २०२२च्या विधानसभा निवडणुकीपूर्वी घाईगडबडीत हा पायाभरणी इव्हेंट मुख्यमंत्री डॉ. प्रमोद सावंत व स्थानिक आमदार तथा मंत्री गोविंद गावडेंच्या उपस्थितीत पार पडला होता. मात्र, हा पायाभरणी समारंभ पार पडून आता तीन वर्षे होत आली; तथापि नव्या इमारतीसाठी एक दगडही घालण्यात आलेला नाही. उलट ह्या पायाभरणी समारंभाचा फलक खितपत पडलेला आहे.

रात्रीच्यावेळी एकच डॉक्टर

बेतकी प्राथमिक आरोग्य केंद्रात रात्रीच्यावेळी फक्त एकच डॉक्टर असल्याने केंद्रात रुग्णांच्या रांगा लागलेल्या पहायला मिळत आहेत. उपलब्ध डॉक्टरही काहीच करू शकत नाहीत. ओपीडीतील रुग्णांची तपासणी सुरू असताना अचानक इमर्जन्सी वा अपघात रुग्ण आल्यास डॉक्टरांना धावाधाव करावी लागते. एका डॉक्टरला दोनशेपेक्षा जास्त रुग्ण हाताळावे लागत असल्याने डॉक्टरांवरही मोठा ताण येतोय. त्याखेरीज आरोग्य केंद्रावरील डॉक्टरना वळवई, सावईवेरे व अन्य उप आरोग्य केंद्रांवरही सेवा द्यावी लागत असल्याने त्याचा परिणाम प्राथमिक आरोग्य केंद्रातील रुग्ण हाताळणीवर होत आहे.