Goa Crime: शेअर ट्रेडिंग ॲपवरून 2.5 कोटीची फसवणूक, ज्यादा मोबदल्याच्या आमिषापोटी बसला फटका; अज्ञाताविरुद्ध गुन्हा दाखल

Betki-Khandola financial fraud

फोंडा: शेअर ट्रेडिंगमध्ये जादा मोबदला देण्याच्या आमिषाला बळी पडल्याने बेतकी-खांडोळा येथील एकाला तब्बल अडीच कोटी रुपयांचा फटका बसला आहे. याप्रकरणी सायबर शाखेने अज्ञाताविरुद्ध गुन्हा दाखल केला असून पुढील चौकशी सुरू आहे.

बेतकी-खांडोळा येथील एका व्यक्तीला हा फटका बसला असून पैशांचा हा व्यवहार गेल्या २५ नोव्हेंबर २०२४ ते ७ जानेवारी २०२५ या काळात झाला आहे. संबंधिताने सायबर गुन्हा शाखेत तक्रार दाखल केली आहे.

बेतकी-खांडोळा येथील या इसमाला अज्ञात व्यक्तीने व्हॉटस्ॲप मोबाईल, फेसबूक तसेच इतर माध्यमांद्वारे संपर्क साधला आणि शेअर ट्रेडिंगमध्ये पैसे गुंतवल्यास भरपूर मोबदला मिळेल याची ग्वाही दिली. जादा पैशांच्या मोबदल्याच्या आमिषाला बळी पडलेल्या बेतकी-खांडोळा येथील या इसमाला अज्ञात व्यक्तीने शेअर ट्रेडिंगसाठी लिंक पाठवले. या लिंकद्वारे खात्री पटवण्यात आल्यानंतर शेअर ट्रेडिंग ॲप डाऊनलोड करण्यास सांगितले आणि या ॲपद्वारे वेगवेगळ्या बँक खात्यात पैसे भरण्यास सांगण्यात आले.

बेतकी-खांडोळा येथील त्याने आपल्या खात्यातील पैसे विविध बँक खात्यात जमा केले. सुमारे २ कोटी ४४ लाख रुपये विविध बँक खात्यात जमा करण्यात आले. हा व्यवहार गेल्या ७जानेवारीपर्यंत चालला होता. मात्र शंका आल्यानंतर बेतकी-खांडोळा येथील त्या इसमाने सायबर गुन्हा विभागात धाव घेतल्यावर ‘त्या’ ठकसेनाने लिंक आणि ॲप दोन्ही ब्लॉक करण्यात आली. सध्या सायबर गुन्हा विभागात ही तक्रार दाखल करण्यात आली असून पुढील चौकशी सुरूआहे.