Vegetables Rate in Goa: आरोग्यासाठी फायदेशीर असणारी शेवग्याची शेंग खातेय भाव!

Vegetables Rate in Goa: आरोग्यदायी असणारी शेवग्याची शेंग सध्या भाजीपाला मार्केटमध्ये चांगलाच भाऊ खाऊन जात आहे. दोनशे रुपये किलो दराने तिची विक्री होत असून, चार नगांसाठी 50 रुपये मोजावे लागत आहेत. विशेषतः कर्नाटक बाजारात येणारी शेवग्याच्या शेंगांचा घाऊक बाजार महाराष्ट्राप्रमाणे वधारलेला असल्याने त्याचा परिणाम गोव्यातील विक्री दरावर होत आहे.

सध्या महाराष्ट्रात मुंबई, पुण्यासारख्या मोठ्या शहरांत शेवग्याची शेंग गुजरातमधून आयात होत आहे. इतर ठिकाणच्या शहरात मागील आठवड्यात शेवग्याच्या शेंगांचा क्विंटलचा दर सात ते बारा हजार रुपयांपर्यंत राहिल्याची माहिती समोर आली आहे.

बेळगाव बाजारातून गोव्यात या शेंगा दोन प्रकारच्या येतात. त्यात अधिक कालावधीच्या जाडसर आणि कवळ्‍या शेंगांचा सहभाग आहे. जाड आणि साधारण अडीच ते तीन फूट लांबीच्या शेंगांना मागणी आहे. परंतु कवळ्या आणि कमी जाडीच्या शेंगांनाही दर चांगला मिळत आहे.

शेती फायदेशीर

शेवग्याच्या शेंगांचे आरोग्यदायी महत्त्व वाढत असल्याने खरे तर येथील शेतकऱ्यांना हे पीक घेणे फायदेशीर ठरू शकते. ज्या प्रमाणात शेवग्याच्या शेंगांची शेती आवश्‍यक आहे, तेवढ्या प्रमाणात होत नाही. शेवग्याची स्थानिक पातळीवर शेती झाल्यास या शेंगा मार्केटमध्ये सहज उपलब्ध होऊ शकतात. ज्या दराने शेंगा खरेदी कराव्या लागतात, ते पाहता हे पीक नक्कीच फायदेशीर आहे, हे नक्की.

आरोग्यदायी शेवगा

‘क' जीवनसत्त्व असलेली शेवग्याची शेंग नियमित आहारात असल्यास शारीरिक थकवा येत नाही. अपचन, त्याशिवाय डोळ्यांचे आरोग्य राखण्यासाठी ही शेंग फायदेशीर असते. त्याशिवाय शेवग्याचा पालाही भाजी म्हणून वापरतात. अलीकडे शेवग्याच्या शेंगांचे फायदे लोकांच्या लक्षात येत असल्याने त्यांच्या खरेदीकडे ग्राहकांचा कल असतो.