Goa Road Issue: बायंगिणी - सांतान रस्ता पुढील एक वर्ष राहणार बंद!

Goa Road Issue: बायंगिणी – सांतान येथील रस्ता 28 जुलै 2023 पासून बंद असल्याने नागरिकांची प्रचंड गैरसोय होत आहे. संरक्षण भिंत कोसळल्याने हा रस्ता वाहतुकीसाठी बंद केला होता.

या रस्त्याचे काम करण्यासाठी सविस्तर प्रकल्प अहवाल सरकारच्या मान्यतेसाठी पाठवला गेला असून निविदा काढल्यानंतर पावसाळा वगळता 240 दिवसांत काम पूर्ण करण्याची मुदत दिली आहे. त्यामुळे पुढील एक वर्ष हा रस्ता बंदच राहणार असल्याची शक्यता निर्माण झाली आहे.

बायंगिणी - सांतान रस्त्याविषयी वेळ्ळीचे आमदार क्रूझ सिल्वा यांनी विधानसभेत अतारांकित प्रश्न विचारला होता. त्यांच्या प्रश्नाला लेखी उत्तर सार्वजनिक बांधकाम खात्याने दिले आहे.

28 जुलैला कोसळली होती भिंत

28 जुलै रोजी बायंगिणी – सांतान रस्त्यावरील संरक्षण भिंत कोसळली होती. या भिंतीला भेगा पडल्याचे लक्षात येताच स्थानिकांनी अधिकाऱ्यांच्या निदर्शनास आणून दिली होती. त्यानंतर भिंत कोसळली. सविस्तर प्रकल्प अहवालात भिंत कोसळण्याचे मुख्य कारण पाणी झिरपून संरक्षक भिंतीची छिद्रे गाळाने बंद झाल्याने पावसाळ्यात पाण्याचा ताण वाढला, परिणामी एका बाजूने भिंत कोसळली.