Bandoda Road Accident Risk: बांदोड्यात गटारावरील लोखंडी जाळी उखडली; 6 महिन्यांपासून अपघाताचा धोका!

दुर्भाट: रामनाथी, बांदोडा येथील मुख्य रस्त्यावर गटारावर बसवलेली लोखंडी जाळी गेल्या तब्बल सहा महिन्यांपासून उखडलेल्या अवस्थेत आहे. या बिघडलेल्या जाळीमुळे या मार्गावरून ये-जा करणाऱ्या वाहनचालकांना आणि पादचाऱ्यांना मोठा धोका निर्माण झाला आहे.

याबाबत सार्वजनिक बांधकाम खात्याकडे वारंवार तक्रार करूनही दुर्लक्ष केले जात असल्याने नागरिकांमध्ये नाराजी व्यक्त होत आहे. या रस्त्यावरून दररोज मोठ्या प्रमाणावर दुचाकी, चारचाकी वाहने आणि स्थानिक नागरिकांची ये-जा सुरू असते.

रस्त्याच्या मध्यभागी असलेल्या ओहळावरील लोखंडी जाळी उखडल्यामुळे वाहनांची चाके त्यात अडकण्याची किंवा घसरण्याची शक्यता असून, त्यामुळे गंभीर अपघात होऊ शकतो. विशेषतः रात्रीच्या वेळी किंवा अंधारात ही जाळी सहजपणे दिसत नसल्याने अपघाताचा धोका अधिक आहे. सार्वजनिक बांधकाम खात्याने याकडे त्वरित लक्ष देऊन उखडलेली लोखंडी जाळी पुन्हा सुस्थितीत बसवावी, अशी मागणी होत आहे.