अमली पदार्थ प्रकरणातील संशयिताला जामीन मंजूर

मडगाव : अमली पदार्थ व्यवहार प्रकरणात मायणा कुडतरी पोलिसांनी एकाला अटक केली होती. याच अटक केलेल्या वारखंड फोंडा येथील नवीन नाईक या संशयिताला दक्षिण गोव्याचे अतिरिक्त सत्र न्यायाधीश व्हिन्सेंट डिसिल्वा यांनी 50 हजार आणि तेवढ्याच हमीच्या जामिनावर मुक्त केलं आहे.

वारखंड फोंडा येथील रहिवासी असलेल्या नवीन याला मायणा कुडतरी पोलिसांनी अटक केली होती. त्याच्याकडून तब्बल दीड लाखांचा गांजाही पोलिसांनी जप्त केला होता. या प्रकरणी पोलिसांनी त्याचा साथीदार बिट्टू कुमार सिंग यालाही अटक केली होती. त्याच्या पोलीस कोठडीचा रिमांड संपल्याने त्यालाही न्यायालयीन कोठडीत पाठविण्यात आले आहे.

दरम्यान गोव्यात अमली पदार्थांच्या तस्करीसह जुगारासारख्या घटनांमध्येही वाढ झाली आहे. मडगाव रेल्वे उड्डाण पुलाखाली एका आलिशान दुकानात चालू असलेल्या एका मिनी कॅसिनोवर मडगाव पोलिसांनी नुकतीच धाड घालून 9 जणांना अटक केली. भर बाजारात हा जुगार अड्डा चालू असूनही त्याकडे एवढे दिवस पोलिसांचे लक्ष गेले नव्हते. मात्र पोलिसांनी केलेल्या धडक कारवाईत सुमारे अडीच लाखांचा माल पकडला गेला आहे