Goa Politics: 'निवृत्ती ही अफवा, पेडणेतूनच लढणारच'! माजी उपमुख्यमंत्री आजगावकरांचा निर्धार; 2027 विधानसभेसाठी ठोकला शड्डू

सासष्टी: मी राजकारणातून निवृत्ती पत्करली आहे, असा व्हिडिओ कुणीतरी समाज माध्यमांवर व्हायरल करत आहे. ही केवळ अफवा आहे. ज्या विरोधकांना माझ्यापासून भीती वाटते, तेच हे काम करत आहेत.

खरे तर, मी २०२७ मध्ये पेडणे विधानसभा मतदारसंघातून निवडणूक लढवणार आहे. माझा तसा निर्धार आहे, असे माजी आमदार व माजी उपमुख्यमंत्री मनोहर ऊर्फ बाबू आजगावकर यांनी स्पष्ट केले आहे.

पेडण्‍यात जो विकास झाला आहे, तो माझ्‍यामुळेच. माजी आमदार व केरळचे विद्यमान राज्यपाल राजेंद्र आर्लेकर यांची जी कामे अर्धवट होती, ती सर्व मी पूर्ण केली. स्टेडियम, स्मशानभूमी, रस्त्यांचे हॉटमिक्स डांबरीकरण मीच केले. म्‍हणूनच चारवेळा निवडून आलो, असे आजगावकर यांनी सांगितले.

मगो, काँग्रेस व भाजप या पक्षांच्या चार सरकारांमध्ये मी काम केले. पक्षांतर केले पण लोकांच्या हितासाठी केले. काही लोक पक्षांतर करतात, पण काम करत नाहीत. पेडणेतील नगरपालिका निवडणुकीत मी हस्तक्षेप करणार नाही. केवळ चांगले लोक निवडून यावेत, असेच मला वाटते, असेही आजगावकर म्‍हणाले.