Goa Tourism: पर्यटन प्रतिमा मलीन करण्याचा प्रयत्न : लोबो

Goa Tourism: कांदोळी व कळंगुट येथील समुद्राच्या पाण्यात ई-कॉलाय बॅक्टेरिया आढळून आल्याचा अहवाल तयार करून कोणीतरी गोव्याची पर्यटन प्रतिमा खराब करण्याचा प्रयत्न करत आहे. कळंगुटचे आमदार मायकल लोबो यांनी बुधवारी मुख्यमंत्र्यांसोबत होणाऱ्या बैठकीत हा मुद्दा उपस्थित करून यावर तोडगा काढण्याचे आश्वासन दिले.

सोमवारी दुपारी पर्वरी सचिवालयाबाहेर पत्रकारांशी बोलताना कळंगुटचे आमदार मायकल लोबो यांनी कळंगुट आणि कांदोळी किनाऱ्यावरील समुद्राच्या पाण्यात ई-कोलायचे जीवाणू सापडल्याचा अहवाल तयार करून कोणीतरी गोव्याची पर्यटनाशी संबंधित प्रतिमा खराब करण्याचा प्रयत्न करत असल्याचा आरोप केला. 

येत्या बुधवारी मुख्यमंत्र्यांसोबत होणाऱ्या बैठकीत हा प्रश्न उपस्थित करणार असून गोवा राज्य प्रदूषण नियंत्रण मंडळाने तयार केलेल्या या तपासणी अहवालामागील अधिकारी कोण याचा शोध घेणार असल्याचे लोबो यांनी सांगितले.

पर्यटन धोक्यात ?

पर्यटन हंगामात, देशी-विदेशी पर्यटक सूर्य स्नान व आनंद घेण्यासाठी किना-यावर येतात. ई-कोलायची लागण झालेल्या किनाऱ्यांचा अहवाल आल्यास स्थानिक व्यवसायांना बाधा येईल. पर्यटनावर परिणाम होईल ,असे आमदार लोबो म्हणाले.