Assembly Election 2026: सिनेपडद्यानंतर आता राजकारणातही 'विजय'! प्रस्थापितांना धूळ चारत मिळविला ऐतिहासिक विजय, ममतांच्या बालेकिल्ल्यात कमळ फुलले!

कोलकता-चेन्नई (पीटीआय): उत्तरेनंतर भाजपच्या विजयाचा वारू पूर्वेलाही चौखूर उधळला. प्रस्थापितविरोधी लाट आणि पंतप्रधान नरेंद्र मोदी यांचा करिष्मा यामुळे प्रथमच पश्चिम बंगालमध्ये कमळ फुलले असून जनतेने ममता बॅनर्जी आणि त्यांच्या तृणमूल काँग्रेसला नाकारले आहे. दक्षिणेकडे तमिळी जनतेला नवा नायक मिळाला असून अभिनेते विजय यांच्या ‘टीव्हीके’ पक्षाने सर्वाधिक जागा मिळविल्या आहेत. डाव्यांचा केरळमचा अखेरचा गडही ढासळला आहे. पाचपैकी तीन (पश्चिम बंगाल, तमिळनाडू, केरळम) राज्यांतील विधानसभा निवडणुकीचे निकाल हे प्रस्थापितांना नाकारणारे ठरले.

आसामच्या मळ्यात हिमंता बिस्व सरमा यांच्या रूपाने पुन्हा कमळ फुलले असून पुदुच्चेरीमधील राष्ट्रीय लोकशाही आघाडीची (एनडीए) सत्ता कायम आहे. या निकालाचे राष्ट्रीय राजकारणात देखील पडसाद उमटणार हे निश्चित आहे. विरोधकांच्या ‘इंडिया’ आघाडीची ताकद कमी होणार असून सत्ताधारी राष्ट्रीय लोकशाही आघाडी (एनडीए) आणखी पॉवरफुल होईल. बंगालमध्ये सलग चौथ्यांदा सत्ता मिळविण्याचे तृणमूल काँग्रेसचे स्वप्न भंगले आहे. बंगालमधील विधानसभा निवडणुकीच्या प्रचारामध्ये धार्मिक ध्रुवीकरण, मतदारयाद्यांची फेरपडताळणी हे मुद्दे गाजले होते. पश्चिम बंगालमध्ये मुख्यमंत्रिपदासाठी सुवेंदू अधिकारी, दिलीप घोष, समीक भट्टाचार्य, अग्निमित्रा पॉल आणि रुपा गांगुली यांची नावे चर्चेत आहेत.

तमिळनाडूच्या जनतेने अभिनेते विजय यांना जननायक ठरविले आहे. कधीकाळी दक्षिणेच्या राजकारणाचे सूत्रसंचालक ठरलेल्या एमजी रामचंद्रन आणि जे.जयललिता यांच्या रांगेत आता विजय यांचा समावेश झाला आहे. विजय यांची प्रचारमोहीम चर्चेचा विषय ठरली होती. विवाहासाठी आठ ग्रॅम सोने देण्यासह त्यांनी त्यांच्या जाहीरनाम्यात ६० वर्षांखालील महिलांना दरमहा अडीच हजार रुपये मदत, प्रत्येक कुटुंबाला सहा मोफत गॅस सिलिंडर देण्याचे आश्वासन दिले होते.

केरळममधील पराभव हा डाव्या पक्षांच्या जिव्हारी लागला असून प्रथमच देशात डाव्यांकडे कोणतेही राज्य शिल्लक राहिलेले नाही. या पराभवावर आम्ही सखोल विचारमंथन करू, असे माकपचे सरचिटणीस एम.ए.बेबी यांनी सांगितले. भाजपच्या विजयामुळे धर्मांध आणि जातीयवादी शक्तींना बळ मिळेल, अशी भीतीही त्यांनी बोलून दाखविली. विद्यमान मुख्यमंत्री पी. विजयन यांनी या पराभवाची नैतिक जबाबदारी स्वीकारली असून त्यांनी मुख्यमंत्रिपदाचाही राजीनामा दिला आहे.