Goa Municipality Elections : निवडणुकीची तारीख जाहीर झाल्याने उमेदवारीसाठी रस्सीखेच!

मिलिंद म्हाडगुत

निवडणुकीची तारीख जाहीर झाल्याने राजकीय पक्षांमध्ये तयारीला वेग आला आहे. आता लवकरच प्रत्येक राजकीय पक्ष आपले पॅनल जाहीर करणार असून फोंडा पालिका सत्ताधारी पक्षाबरोबर राहत असल्याचे इतिहास सांगत असल्यामुळे भाजप पॅनलची उमेदवारी मिळविण्याकरता रस्सीखेच सुरू झाली आहे.

मागच्या खेपेलाही मनोज केणी व विद्या पुनळेकर यांनी अशीच आरक्षणाविरोधात याचिका दाखल केली होती. पण न्यायालयाने निवडणूक प्रक्रियेवर ‘स्टे’ न दिल्यामुळे या याचिकेचा कोणताही परिणाम निवडणुकीवर झाला नव्हता.

आता यावेळी काय होते हे बुधवारी कळू शकेल. पण तारीख जाहीर झाल्यामुळे निवडणुकीचे पडघम जोरात वाजायला सुरुवात झाली असून अनेकजण आपले नशीब अजमावण्याकरता तयारीला लागले आहेत. महिलांकरता आरक्षित झालेल्या प्रभागात आपल्या सौभाग्यवतीला वा मुलीला रिंगणात उतरविण्याच्या प्रयत्नात काही आजी-माजी नगरसेवक आहेत.

नगरसेवक शांताराम कोलवेकर यांचा प्रभाग क्रमांक दहा इतर मागासवर्गीयांतील महिलांकरता आरक्षित झाल्यामुळे ते आपल्या सौभाग्यवतीला रिंगणात उतरविणार असल्याचे कळते. त्या भाजप पॅनलतर्फे लढू शकतात.

माजी नगराध्यक्ष किशोर नाईक हेही हाच फॉर्म्युला गिरवण्याच्या तयारीत असल्याची माहिती प्राप्त झाली आहे. माजी नगराध्यक्ष प्रदीप नाईक यांचाही प्रभाग महिलांकरता आरक्षित झाल्यामुळे त्यांनी न्यायालयात याचिका दाखल केली आहे. हा प्रभाग सलग तीन निवडणुकांत आरक्षित झाल्यामुळे आपल्यावर अन्याय झाला आहे, असा त्यांचा दावा आहे.

२०१३ साली झालेल्या पालिका निवडणुकीत त्यांच्या सौभाग्यवती रिंगणात उतरल्या होत्या; पण त्यावेळी त्यांना पराभूत व्हावे लागले होते. प्रभाग क्रमांक नऊमध्ये प्रभाग क्रमांक तीनची मते घुसडल्याचा दावा करून या प्रभागाचे माजी नगरसेवक विन्सेंट फर्नांडिस यांनी याचिका दाखल केली आहे. सध्या त्यांच्या सौभाग्यवती सीमा या प्रभागाचे प्रतिनिधित्व करत आहेत.

काँग्रेस उतरवणार दहा उमेदवार

मगो पक्षाच्या ‘रायझिंग फोंडा’ या पॅनलने आपली तयारी सुरू केली असून त्यांच्याजवळ काही हुकमी एक्के असल्याचे दिसते आहे.

काँग्रेसही आठ ते दहा उमेदवार रिंगणात उतरविणार असल्याची माहिती प्राप्त झाली असून तेही आपला पॅनल लवकरच जाहीर करणार असल्याचे कळते.