Goa News 2021 साली गोवा मुक्तिदिन हीरक महोत्सव समारोप समारंभ ताळगाव पठारावरील डॉ. श्‍यामाप्रसाद मुखर्जी स्टेडियमवर पंतप्रधान नरेंद्र मोदी यांच्या उपस्थितीत झाला होता. त्‍यासाठी सरकारने सुमारे 9.25 कोटी रुपये खर्च केले.
या एकूण खर्चापैकी वास्कोस्थित इव्हेंट मॅनेजमेंट कंत्राटदार ‘विन्सन ग्राफिक्स’ला 8.91 कोटी रुपये देण्यात आले. ही बाब माहिती हक्क कायद्याखाली ॲड. आयरिश रॉड्रिग्स यांनी मिळवलेल्या माहितीमध्ये उघड झाली आहे. सरकारकडून होणाऱ्या कोट्यवधींच्‍या अवाजवी खर्चाची दक्षता खात्याने चौकशी करण्याची गरज आहे, असे मतही त्‍यांनी व्यक्त केलेय.
समारोप समारंभासाठी एकूण 9 कोटी 25 लाख 23 हजार 341 रुपये खर्च झाला. त्यातील 8 कोटी 91 लाख 16 हजार 612 रुपये ‘विन्सन ग्राफिक्स’ला सरकारने दिले आहेत. याव्यतिरिक्त बसेसच्या भाड्यावर 28 लाख 46 हजार 391 रुपये खर्च केले.
त्यामध्ये 208 कदंब बसेस, 20 बालरथ व 163 खासगी बसेसचा समावेश आहे. स्टेडियमच्या भाड्यापोटी 5 लाख 60 हजार 500 रुपये गोवा क्रीडा प्राधिकरणाला दिले.
या सोहळ्यासाठी ‘सीसीटीव्ही’ कॅमेऱ्यांसाठी 11 लाख रुपये, स्टेडियमच्या बाहेर बसण्याची व्यवस्था आणि एलईडी स्क्रीनसह शामियाना उभारण्यासाठी 25 हजार रुपये दिले गेले.
सरकारी प्रकल्पांच्या उद्‍घाटनासाठी 5 मिनिटे 10 सेकंदांची ऑडिओ व्हिज्युअल फिल्म बनवण्यासाठी 8 लाख 67 हजार 300 रुपये खर्च केले, तर त्‍या प्रवेशद्वारांवर दाखवण्‍यासाठी 34 लाख रुपये खर्च केले.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.