Goa Assembly Budget Session : चार दिवसीय अधिवेशनात तब्बल 803 प्रश्‍न; 28 मार्चला अर्थसंकल्प

महिनाअखेरीस होत असलेल्या अर्थसंकल्पीय अधिवेशनात सरकारला घेरण्यासाठी विरोधकांनी जोरदार तयारी केली आहे. चार दिवसांच्या अधिवेशनात आमदारांकडून तब्बल 803 प्रश्‍न विचारण्यात येणार आहेत.

अधिवेशनात विरोधी पक्ष एकत्रित दिसतील. आम्ही जनतेच्या विविध प्रश्‍नांना अधिवेशनात वाचा फोडू, असे विरोधी नेत्यांनी सांगितले. 27 मार्चपासून सुरू होणारे विधानसभा अधिवेशन 31 मार्चपर्यंत असे 5 दिवस चालेल, असे जाहीर केले होते.

30 तारखेला रामनवमी असल्याने त्या दिवशी अधिवेशन होणार नाही, असे सभापती कार्यालयाकडून जाहीर झालेले आहे. अगोदरच पाच दिवसांचे अधिवेशन आणि त्यात सुट्टी यामुळे वैतागलेल्या विरोधकांनी सरकारवर टीकेची झोड उठवली आहे.

तरीही विरोधी पक्ष या नात्याने जनतेच्या जास्तीत जास्त प्रश्‍नांना विधानसभा दालनात वाचा फोडू, असे विरोधी पक्षनेते युरी आलेमाव यांनी म्हटले आहे.

207 तारांकित, 596 अतारांकित

केवळ 4 दिवसांचे अधिवेशन असले तरी विरोधकांनी सरकारला घेरण्यासाठीची पुरेपूर तयारी केलेली आहे. या 4 दिवसांमध्ये विधानसभा सदस्यांकडून 207 तारांकित आणि 596 अतारांकित, असे तब्बल 803 प्रश्‍न विधानसभेत सरकारला विचारण्यात आले आहेत.

यावरून विरोधी पक्षांची तयारी दिसते. यातील काही प्रश्‍न एकत्र क्लब करून विचारण्यात आले आहेत, अशी माहिती विरोधी आमदारांनी दिली आहे.

20 रोजी निर्णय

हे अर्थसंकल्पी अधिवेशन असून यापूर्वी ठरल्याप्रमाणे मुख्यमंत्री डॉ. प्रमोद सावंत अर्थमंत्री या नात्याने पहिल्या दिवशी 27 मार्चला अर्थसंकल्प सादर करतील, अशी अपेक्षा होती.

मात्र, हा अर्थसंकल्प 28 तारखेला सादर होण्याची शक्यता आहे. यावर 20 मार्च रोजी होणाऱ्या कामकाज सल्लागार समितीच्या बैठकीमध्ये अंतिम निर्णय होणार आहे, असे विधानसभा प्रशासनाकडून सांगण्यात आले आहे.