केजरीवाल उद्या गोव्यात मोठी घोषणा करण्याची शक्यता

पणजी : आपचे सर्वेसर्वा आणि दिल्लीचे मुख्यमंत्री अरविंद केजरीवाल उद्या गोवा दौऱ्यावर येणार आहेत. आपल्या गोवा दौऱ्यात केजरीवाल 'आप'चा मुख्यमंत्रीपदाचा उमेदवार घोषित करण्याची शक्यता आहे. त्यामुळे केजरीवाल आपल्या या दौऱ्यात नेमकी काय भूमिका स्पष्ट करतात याकडे सर्वांचं लक्ष लागून राहिलं आहे.

मागच्याच आठवड्यात अरविंद केजरीवाल गोवा दौऱ्यावर आले होते. अरविंद केजरीवल शनिवार आणि रविवार दोन दिवसाच्या गोव्याच्या दौऱ्यावर होते. दौऱ्यादरम्यान त्यांनी अनेक ठिकाणी लोकांची भेट घेतली आणि पक्षाचा प्रचार केला. यावेळेस त्यांनी भाजप विरोधी युतीबद्दलही सूचक वक्तव्य केले आहे.

गोवा विधानसभा निवडणुकीत स्पष्ट जनादेश न मिळाल्यास आप सरकार स्थापन करण्यासाठी भाजपविरोधी पक्षाबरोबर युती करण्याचा विचार करेल, असे अरविंद केजरीवाल (Arvind Kejriwal) यांनी सांगितले.

मात्र हे बोलताना त्यांनी निवडणुकांच्या (Election) आधी कुठल्याही पक्षाबरोबर युती करणार नसल्याचे स्पष्ट केले. आप स्वबळावर गोवा विधानसभा निवडणूक लढवेल, असे ते म्हणाले. त्यातच आता केजरीवाल बुधवारी आपल्या गोवा दौऱ्यात मोठी घोषणा करण्याची शक्यता आहे.