Arpora Nightclub Fire Case: ...म्हणून लुथरा बंधूं देशाबाहेर पळाले, हडफडे दुर्घटनाप्रकरणी सरकारी यंत्रणांची मोठी चूक

पणजी: हडफडे येथे आगीच्या भक्ष्यस्थानी पडलेल्या क्लबचा नेमका मालक कोण याची माहिती सुरवातीला सरकारी यंत्रणेकडे नव्हती. त्यामुळे लुथरा बंधूंना देशाबाहेर पळणे शक्य झाले अशी माहिती मिळाली आहे.

आग लागल्यानंतर तेथे पोलिस व अग्नीशमन दलाचे कर्मचारी पोचले. तेथील कर्मचाऱ्यांकडून मालकाचे नाव घेण्यासाठी त्यांच्याकडे वेळच नव्हता कारण तेथे कोलाहाल माजला होता. आत अडकलेल्यांचे नातेवाईक, आप्तस्वकीय बाहेर टाहो फोडत होते.

याच दरम्यान तिकडे दिल्लीत (Delhi) लुथरा बंधूंनी थायलंडला जाण्याची योजना तातडीने तयार केली आणि तिकीटही आरक्षित केले. प्रत्यक्षात त्यांचे विमान थायलंडकडे दिल्लीच्या इंदिरा गांधी आंतरराष्ट्रीय विमानतळावरून पहाटे ५.३० वाजता झेपावले. लुथरा बंधू हेच या क्लबचे मालक परवानाधारक असल्‍याची खात्रीशीर माहिती सरकारी यंत्रणेकडे असती तर त्यांना दिल्ली पोलिसांच्या मदतीने दिल्लीतच गोवा पोलिस (Goa Police) पकडू शकले असते.

सरकारी यंत्रणेकडे माहिती हवी

एका वरिष्ठ अधिकाऱ्याला याबाबत विचारले असता त्याने याला दुजोरा दिला. तो म्हणाला, एक क्लब जळाला पण उर्वरित आस्थापनांचे नेमके मालक कोण, ते कोण चालवतात. मालक, क्लब चालक कुठे राहतात, त्यांचे मोबाईल क्रमांक अशी माहिती सरकारी यंत्रणेकडे असणे आवश्यक आहे. अजूनही त्यादिशेने पावले टाकण्यात आलेली नाहीत.