Goa Nightclub Fire: बर्च क्लबमध्ये आग भडकली, 'तो' पळाला UK ला; सुरिंदर कुमार खोसला याला इंटरपोलची ब्ल्यू कॉर्नर नोटीस

म्हापसा: हडफडे येथील ‘बर्च’ क्लब दुर्घटनाप्रकरणी गोवा पोलिसांनी नव्याने हालचाली वेगवान केल्या आहेत. याप्रकरणी पोलिसांनी बर्च क्लबस्थित मालमत्तेचा मालक सुरिंदर कुमार खोसला याच्याविरोधात ‘इंटरपोल’ची ब्ल्यू कॉर्नर नोटीस बजावण्याची प्रक्रिया सुरू केली आहे.

अग्नितांडवानंतर दुसऱ्याच दिवशी सुरिंदर यूकेला गेला होता. त्याच्याकडे यूकेचे (ब्रिटीश) राष्ट्रीयत्व आहे. गोवा पोलिसांनी यापूर्वीच खोसलाविरुद्ध लुक आऊट नोटीस जारी केली होती.

पोलिसांनी सांगितले की, संशयिताचे ठिकाण शोधण्यासाठी व तपासासाठी खोसला याची उपस्थिती सुनिश्चित करण्यासाठी हे पाऊल उचलले आहे.

हडफडे येथील भीषण दुर्घटनेप्रकरणी हणजूण पोलिसांनी नोंदवलेल्या गुन्ह्यात खोसला हा एक संशयित आहे. या नोटिसीचा उद्देश गुन्हेगाराची ओळख, ठिकाण व त्याच्या हालचालींविषयी माहिती गोळा करणे, हा आहे.

म्हणणे मांडण्यास पोलिसांना हवा वेळ

पोलिस कोठडीत असलेला लुथरा बंधूंचा सहभागीदार अजय गुप्ता तसेच संशयित भरत कोहली या दोघांनी दाखल केलेल्या जामीन अर्जासंदर्भात हणजूण पोलिसांनी विद्यमान जिल्हा पंचायत निवडणुकांमधील व्यस्ततेचे कारण देत, म्हणणे सादर करण्यासाठी शनिवारी (२० डिसेंबर) अतिरिक्त वेळ मागितला. परिणामी, म्हापसा अतिरिक्त सत्र न्यायालयाने या प्रकरणाची सुनावणी सोमवारपर्यंत (२२ डिसेंबर) पुढे ढकलली आहे.

दोघांच्या जामीन अर्जावर उद्या सुनावणी

संशयित भरत कोहली हा सध्या न्यायालयीन कोठडीत आहे. पोलिसांच्या माहितीनुसार, तो ‘बर्च बाय रोमियो लेन’ क्लबचे दैनंदिन कामकाज चालवायचा. हणजूण पोलिस या दोघांच्या जामीन अर्जावर न्यायालयात काय म्हणणे सादर करतात, हे सोमवारीच स्पष्ट होईल.