वेर्णा येथील सिप्लाविरोधात कर्मचारी रस्त्यावर, कंपनीकडून सतावणूक होत असल्याचा आरोप

वेर्णा येथील औद्योगिक परिसरात असलेल्या सिप्ला कंपनीत महाराष्ट्रातील दोन कर्मचाऱ्यांचा अपघाती मृत्यू झाला. याप्रकरणी कंपनी वादाच्या भोवऱ्यात सापडली असताना आता कर्मचाऱ्यांनी कंपनीवर सतावणुकीचा आरोप केला आहे. शनिवारी (दि. २७ जुलै) पणजीतील आझाद मैदानावर कर्मचाऱ्यांनी निषेध आंदोलन करत कंपनीविरोधात घोषणाबाजी केली.

पणजीतील आझाद मैदानावर सिप्ला कंपनीच्या सुमारे तीनशे कामगारांनी एकत्र येत निषेध आंदोलन केलं. गेल्या दोन वर्षापासून कंपनी सतावणूक करत असल्याचा आरोप कामगारांनी केला. कोणत्याही प्रकारची पूर्वकल्पना न देता आसाम, सिक्कीम सारख्या राज्यात कर्मचाऱ्यांची बदली केली जात असून, हे प्रकार थांबले पाहिजेत, अशी मागणी आंदोलनकर्त्या कर्मचाऱ्यांनी केली.

कर्मचाऱ्यांनी बदली दूरच्या राज्यात केली जात असल्याबाबतचा मुद्दा आमदार विजय सरदेसाई शुक्रवारी अधिवेशनात उपस्थित केला होता. एका कर्मचाऱ्यांने पत्र लिहून त्यांना याबाबत माहिती दिल्याचा उल्लेख सरदेसाईंनी सभागृहात केला होता.

कर्मचाऱ्यांना पूर्वकल्पना न देता अशाप्रकारे परराज्यात बदली केली जात असल्याचे प्रकार कंपनी करत असल्याचे सरदेसाईंनी सभागृहात सांगितले.

भारतीय कामगार सेनेने देखील हा मुद्दा उचलून धरला आहे. काही दिवसांपूर्वी सेनेच्या रघुनाथ कुचिक यांच्यावतीने फार्मा क्षेत्रासाठी गोवा सरकारने लावलेला एस्मा मागे घेण्याची विनंती करणारे निवेदन कामगार उपायुक्तांना देण्यात आले.

महाराष्ट्रातील दोन कामगारांचा सिप्ला कंपनीत गुदमरुन मृत्यू झाल्याचा प्रकार गुरुवारी उघडकीस आला होता. त्यानंतर कंपनीतील कर्मचाऱ्यांनी समस्यांचा पाढा वाचण्यास सुरुवात केली.