Goa Drug Raid: मुंबई टू गोवा 'ड्रग्ज' तस्करी! म्हापशात पोलिसांच्या जाळ्यात अडकला मोठा मासा; 7.84 लाखांच्या हायड्रोपोनिक वीडसह एक अटकेत

Mumbai to Goa drug smuggling case : गोव्याच्या अंमली पदार्थ विरोधी पथकाने (ANC) अंमली पदार्थांच्या तस्करीविरोधात मोठी कारवाई करत एका नवी मुंबईकर तरुणाला बेड्या ठोकल्या. म्हापसा परिसरात केलेल्या या छापेमारीत सुमारे 7.84 लाख रुपये किमतीचे उच्च दर्जाचे 'हायड्रोपोनिक वीड' जप्त करण्यात आले. रविवारी, 22 फेब्रुवारी रोजी ही धडक कारवाई करण्यात आली असून यामुळे अंमली पदार्थ विक्रेत्यांचे धाबे दणाणले आहेत.

मिळालेल्या माहितीनुसार, अंमली पदार्थ विरोधी पथकाला म्हापसा येथील यार्ड पार्किंग परिसरात एक तरुण संशयास्पदरीत्या फिरत असल्याची खात्रीशीर माहिती मिळाली होती. या माहितीच्या आधारे पोलिसांनी सापळा रचला आणि संबंधित तरुणाची झडती घेतली. यावेळी त्याच्याकडे 224 ग्रॅम वजनाचे हायड्रोपोनिक वीड सापडले. आंतरराष्ट्रीय बाजारपेठेत या मालाची किंमत 7 लाख 84 हजार रुपये इतकी असल्याचे सांगण्यात येत आहे. पोलिसांनी तात्काळ हा अंमली पदार्थाचा साठा जप्त केला असून संबंधित तरुणाला बेड्या ठोकल्या आहेत.

अटक करण्यात आलेल्या आरोपीचे नाव अनिरुद्ध अशोक भोगले (वय 25 वर्षे) असे असून तो मूळचा नवी मुंबईतील वाशी येथील रहिवासी आहे. गोव्यासारख्या पर्यटनस्थळी तो हा अंमली पदार्थ विक्रीसाठी घेऊन आला होता की त्याच्याकडे केवळ साठा होता, याचा तपास आता पोलीस करत आहेत. हायड्रोपोनिक वीड हे सामान्य गांजाच्या तुलनेत अधिक महागडे आणि घातक मानले जाते, कारण त्याची शेती कृत्रिम वातावरणात आणि पाण्यावर केली जाते. उच्चभ्रू ग्राहकांमध्ये या अंमली पदार्थाला मोठी मागणी असल्याने याचे रॅकेट दूरवर पसरलेले असण्याची शक्यता नाकारता येत नाही.

गोव्याचे (Goa) अंमली पदार्थ विरोधी पथक सध्या पर्यटकांच्या वर्दळीच्या ठिकाणी अशा समाजविघातक कृत्यांवर कडक पाळत ठेवून आहे. म्हापसा येथील यार्ड पार्किंगसारख्या सार्वजनिक ठिकाणी अशा प्रकारे अंमली पदार्थांची देवाणघेवाण होणे ही चिंतेची बाब मानली जात आहे. या कारवाईमुळे गोव्यातील अंमली पदार्थांच्या पुरवठ्यावर मोठा आघात झाला आहे. पोलीस आता अनिरुद्धच्या संपर्कात कोणकोणते लोक होते आणि हा माल त्याने कुठून आणला होता, या दिशेने तपास चक्रावून फिरवत आहेत.